تہران (اے بی این نیوز) ایران میں جنگ کے دوران امریکہ اور اسرائیل نے متعدد بم گرائے جن میں سے کچھ پھٹنے میں ناکام رہے۔
بین الاقوامی خبر رساں ادارے کے مطابق ایران میں ان علاقوں کو صاف کیا جا رہا ہے جہاں بارود سے بھرے امریکی اور اسرائیلی بم زمین میں دبے ہوئے تھے۔ اس کوشش کے دوران اچانک کچھ بم پھٹ گئے جس سے پاسداران انقلاب کے 14 اہلکار شہید ہو گئے۔ یہ واقعہ تہران کے شمال مغرب میں زنجان شہر کے قریب پیش آیا۔
نور نیوز ویب سائٹ، جسے ایرانی سیکیورٹی ذرائع کے قریب سمجھا جاتا ہے، نے تصدیق کی ہے کہ شہید ہونے والے اہلکاروں کا تعلق پاسداران انقلاب سے تھا اور وہ علاقے کو صاف کرنے کے لیے بارودی سرنگ کی کارروائی میں مصروف تھے۔
رپورٹ میں مزید کہا گیا کہ جائے وقوعہ پر موجود ہتھیاروں میں کلسٹر بم اور فضائی بارودی سرنگیں شامل ہیں جو جنگ کے دوران گرائی گئی تھیں۔ فوجی ساز و سامان کے ماہرین کے مطابق ایسے ہتھیار اکثر فوری طور پر نہیں پھٹتے اور بعد میں انتہائی خطرناک ثابت ہوتے ہیں، خاص طور پر جب انہیں ناکارہ بنانے کی کوشش کی جاتی ہے۔
واضح رہے کہ امریکا اور ایران کے درمیان جنگ بندی 7 اپریل سے نافذ العمل ہے جس کا فائدہ اٹھاتے ہوئے پاسداران انقلاب نے علاقے کو کلیئر کرنے کے لیے آپریشن شروع کیا۔ اسے جنگ بندی کے بعد ایران کی سب سے زیادہ شہادتوں کی شرح قرار دیا جا رہا ہے، جس سے ظاہر ہوتا ہے کہ جنگ کے خاتمے کے باوجود، میدان جنگ میں چھوڑے گئے ہتھیار اب بھی ایک بڑا خطرہ ہیں۔
مزید پڑھیں:پاسپورٹ سےمتعلق بڑی اپڈیٹ
