لاہور (اے بی این نیوز) پاکستان کرکٹ ٹیم کے کپتان سلمان علی آغا نے ٹی ٹوئنٹی انٹرنیشنل کرکٹ میں ایک اور بڑا سنگ میل اپنے نام کر لیا ہے۔ انہوں نے پاکستان کے لیے بطور کپتان تیز ترین نصف سنچریوں کی فہرست میں دوسری پوزیشن حاصل کر لی ہے۔
اعداد و شمار کے مطابق سلمان علی آغا نے 25 گیندوں پر نصف سنچری مکمل کی، جو کسی بھی پاکستانی کپتان کی جانب سے ٹی ٹوئنٹی میں دوسری تیز ترین ففٹی ہے۔ انہوں نے یہ شاندار کارنامہ آسٹریلیا کے خلاف لاہور میں کھیلے گئے میچ کے دوران انجام دیا۔
اس فہرست میں پہلی پوزیشن سابق کپتان محمد حفیظ کے پاس ہے، جنہوں نے 2012 میں احمد آباد میں بھارت کے خلاف 23 گیندوں پر نصف سنچری اسکور کی تھی۔
سابق کپتان بابر اعظم نے دو مرتبہ 27 گیندوں پر ففٹی بنائی، ایک بار 2020 میں راولپنڈی میں زمبابوے کے خلاف اور دوسری بار 2021 میں سنچورین میں جنوبی افریقہ کے خلاف۔
اسی طرح شعیب ملک نے 2007 میں جوہانسبرگ میں سری لنکا کے خلاف 27 گیندوں پر نصف سنچری اسکور کی تھی۔
سلمان علی آغا کی یہ جارحانہ اننگز نہ صرف ان کی شاندار بیٹنگ فارم کی عکاس ہے بلکہ اس بات کا بھی ثبوت ہے کہ وہ بطور کپتان بیٹنگ اور قیادت دونوں شعبوں میں ٹیم کے لیے فیصلہ کن کردار ادا کرنے کی بھرپور صلاحیت رکھتے ہیں۔
مزید پڑھیں:انڈر 19 ورلڈ کپ، پاکستانی اسکواڈ میں اہم تبدیلی
