باجوڑ (اے بی این نیوز) خیبرپختونخوا کے ضلع باجوڑ میں جماعت اسلامی کے صوبائی نائب امیر اور سابق امیدوار برائے صوبائی اسمبلی مولانا وحید گل کی رہائش گاہ پر بم حملہ کیا گیا، تاہم خوش قسمتی سے کوئی جانی نقصان نہیں ہوا۔
پولیس کے مطابق گزشتہ روز مولانا وحید گل کے گھر کے قریب نصب دھماکہ خیز مواد زور دار دھماکے سے پھٹا، جس کے نتیجے میں رہائش گاہ، حجرے اور ایک گاڑی کو شدید نقصان پہنچا۔ پولیس کا کہنا ہے کہ دھماکہ خیز مواد حجرے کے مرکزی گیٹ کے قریب نصب کیا گیا تھا۔
واقعے کے وقت مولانا وحید گل گھر پر موجود نہیں تھے، جس کے باعث وہ محفوظ رہے۔ ڈی پی او باجوڑ وقاص رفیق کے مطابق ابتدائی تحقیقات سے معلوم ہوتا ہے کہ حملے میں آئی ای ڈی استعمال کی گئی۔
دھماکے کے فوراً بعد پولیس نے جائے وقوعہ کو گھیرے میں لے کر شواہد اکٹھے کر لیے اور واقعے کی تفتیش شروع کر دی گئی ہے۔ پولیس کا کہنا ہے کہ ملزمان کی گرفتاری کے لیے سرچ آپریشن جاری ہے اور تمام پہلوؤں سے تحقیقات کی جا رہی ہیں۔
مزید پڑھیں:برطانوی حکومت کا شہریوں کو سفری انتباہ جاری
