لاہور (اے بی این نیوز)دہشت گردی کے خدشات کے پیش نظر کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف شہروں میں کارروائیاں کیں، جن کے دوران بھارتی خفیہ ایجنسی’ را ‘ کے ایجنٹ سمیت 49 دہشت گرد گرفتار کر لیے گئے۔
حکام کے مطابق خفیہ اطلاعات کی بنیاد پر گزشتہ ہفتے مختلف آپریشنز کیے گئے، جن میں لاہور سے بھارتی خفیہ ایجنسی ‘را’ کا ایجنٹ مجتبیٰ بھی گرفتار ہوا۔ گرفتار شدہ ایجنٹ کے قبضے سے بارودی مواد، اسلحہ اور اہم سرکاری و حساس عمارتوں کے نقشے برآمد کیے گئے۔
سی ٹی ڈی حکام نے بتایا کہ گرفتار دہشت گردوں کے قبضے سے دھماکہ خیز مواد اور خودکش جیکٹ بنانے کا سامان بھی برآمد ہوا، اور ابتدائی تحقیقات سے پتہ چلتا ہے کہ یہ افراد مختلف مقامات پر حملے کر کے عوام میں خوف و ہراس پھیلانے کا منصوبہ رکھتے تھے۔
مزید برآں، ایک ماہ کے دوران صوبے بھر میں 6 ہزار 131 کومبنگ آپریشنز کیے گئے، جن میں 599 مشتبہ افراد کو گرفتار کیا گیا جبکہ 2 لاکھ 43 ہزار 546 افراد سے پوچھ گچھ کی گئی۔
سی ٹی ڈی کے مطابق یہ کارروائیاں لاہور، راولپنڈی، جہلم، ٹوبہ ٹیک سنگھ، حافظ آباد، چکوال، گوجرانوالہ، ڈی جی خان اور فیصل آباد میں کی گئیں، اور دہشت گردی کے خطرات کے پیش نظر انٹیلی جنس بیسڈ آپریشنز مزید تیز کرنے کا فیصلہ کیا گیا ہے۔
یہ کارروائیاں سیکیورٹی اداروں کی جانب سے عوام کی حفاظت اور دہشت گردی کے خطرات کم کرنے کے لیے کی جانے والی موثر اقدامات میں شامل ہیں۔
مزید پڑھیں:انڈر 19ورلڈ کپ، بھارت نے بنگلادیش کو شکست دیدی
