اسلام آباد (اے بی این نیوز) محکمہ موسمیات نے آئندہ 24 گھنٹوں کے لیے موسم کی تفصیلی پیشگوئی جاری کر دی۔
رپورٹ کے مطابق کل ملک کے بیشتر علاقوں میں موسم سرد اور خشک رہنے کا امکان ہے جب کہ پہاڑی علاقوں میں درجہ حرارت انتہائی کم رہنے کا امکان ہے۔
پنجاب، بالائی سندھ اور خیبرپختونخوا کے میدانی علاقوں میں درمیانے سے شدید دھند پڑنے کا امکان ہے، جبکہ پوٹھوہار ریجن اور کشمیر میں چند مقامات پر صبح کے اوقات میں دھند پڑنے کی پیش گوئی کی گئی ہے۔
رپورٹ میں کہا گیا ہے کہ تربت میں گزشتہ 24 گھنٹوں کے دوران 01 ملی میٹر بارش ہوئی جب کہ پنجاب، بالائی سندھ اور خیبر پختونخوا کے میدانی اضلاع میں دھند نے معمولات زندگی کو متاثر کیا۔
آج ملک کے مختلف حصوں میں درج ذیل کم سے کم درجہ حرارت ریکارڈ کیا گیا: لیہ منفی 14، سکردو منفی 13، استور اور گوپس منفی 10، ہنزہ اور گلگت منفی 8، قلات اور بگروٹ منفی 6، دیر منفی 5 ڈگری سینٹی گریڈ۔
محکمہ موسمیات کے مطابق اسلام آباد میں کم سے کم درجہ حرارت صفر، کوئٹہ منفی 3، مری منفی 1، لاہور اور کراچی میں 9، پشاور 1، اور مظفرآباد میں 3 ڈگری سینٹی گریڈ رہا۔ شہریوں کو سردی اور دھند کے دوران احتیاطی تدابیر اختیار کرنے کی ہدایت کی گئی ہے۔
مزید پڑھیں:مختلف محکموں میں کرپشن پر حکومتی کارروائی کا فیصلہ
