دبئی (اے بی این نیوز) پاکستانی فاسٹ باؤلر نسیم شاہ پر انٹرنیشنل کرکٹ کونسل (آئی سی سی) کے ضابطہ اخلاق کی خلاف ورزی پر جرمانہ عائد کر دیا گیا۔
نسیم شاہ پر انٹرنیشنل لیگ T20 (ILT20) میں ضابطہ اخلاق کی لیول 1 کی خلاف ورزی پر جرمانہ عائد کیا گیا ہے۔
انٹرنیشنل لیگ T20 میں ڈیزرٹ وائپرز کی نمائندگی کرنے والے فاسٹ بولر نسیم شاہ پر اتوار کو دبئی انٹرنیشنل کرکٹ اسٹیڈیم میں کھیلے گئے لیگ کے سیزن 4 کے فائنل میں ایم آئی ایمریٹس کے خلاف میچ کے دوران لیول 1 کی خلاف ورزی پر میچ فیس کا 10 فیصد جرمانہ عائد کیا گیا ہے۔
22 سالہ نسیم شاہ کو آئی سی سی کوڈ آف کنڈکٹ کے آرٹیکل 2.5 کی خلاف ورزی کا قصوروار پایا گیا تھا، جو آؤٹ ہونے کے بعد کسی بلے باز کی طرف اشتعال انگیز یا توہین آمیز رویے، زبان یا اشاروں سے متعلق ہے۔
تنازعہ کیسے شروع ہوا؟
یہ واقعہ اتوار کو کھیلے گئے انٹرنیشنل لیگ ٹی ٹوئنٹی کے فائنل کے 11ویں اوور میں پیش آیا جب ایم آئی ایمریٹس کے کپتان کیرون پولارڈ نے نسیم شاہ کی گیند کا دفاع کیا اور گیند سیدھی نسیم کی طرف گئی۔
تاہم نسیم شاہ نے گیند اٹھائی اور مسکراہٹ کے ساتھ پولارڈ کی طرف دیکھا جس پر پولارڈ نے جارحانہ ردعمل ظاہر کیا اور دونوں کے درمیان تلخ کلامی شروع ہوگئی۔
HEATED MOMENT BETWEEN NASEEM SHAH & POLLARD IN ILT20 FINAL 🔥pic.twitter.com/dUuXWLkt5g
— junaiz (@dhillow_) January 4, 2026
اس دوران دونوں کھلاڑی ایک دوسرے کے قریب آگئے، پولارڈ واضح طور پر ناراض نظر آئے جب کہ نسیم شاہ بھی جواب دیتے نظر آئے۔
امپائرز اور ڈیزرٹ وائپرز کے کھلاڑیوں نے مداخلت کرکے معاملہ ختم کرایا تاہم دونوں کھلاڑی ناخوش نظر آئے۔
بعد ازاں نسیم شاہ نے 16ویں اوور کی پہلی گیند پر پولارڈ کو آؤٹ کر کے بدلہ لے لیا۔
واضح رہے کہ ڈیزرٹ وائپرز نے فائنل میں ایم آئی ایمریٹس کو 46 رنز سے شکست دے کر پہلی بار انٹرنیشنل لیگ ٹی ٹوئنٹی کا ٹائٹل اپنے نام کیا تھا۔
مزید پڑھیں:بنگلہ دیش کا بڑا فیصلہ، آئی سی سی انڈین نہیں بلکہ انٹرنیشنل ہے، شاہد آفریدی
