لکی مروت (اے بی این نیوز) خیبرپختونخوا کے علاقے لکی مروت کے علاقے نواردہ خیل میں نجی فیکٹری کی بس میں دھماکے سے ایک شخص جاں بحق ہوگیا۔
پولیس کے مطابق لکی مروت میں لکی سٹی تھانے کی حدود میں سیمنٹ فیکٹری جانے والی بس میں دھماکے سے ایک شخص جاں بحق اور دو خواتین سمیت نو افراد زخمی ہو گئے۔
ضلعی پولیس کے ترجمان قدرت اللہ نے بتایا کہ سیمنٹ فیکٹری کے کارکنوں کو لے جانے والی گاڑی کو باغوخیل روڈ پر نواردہ خیل کے علاقے کے قریب فتنہ الخوارج کے دہشت گردوں نے نشانہ بنایا۔
ریاست کی جانب سے کالعدم تحریک طالبان پاکستان سے تعلق رکھنے والے دہشت گردوں کے لیے فتنہ الخوارج کی اصطلاح استعمال کی جاتی ہے۔
پولیس کا کہنا ہے کہ زخمیوں کو فوری طور پر قریبی اسپتال منتقل کر دیا گیا ہے۔ تمام زخمیوں کو طبی امداد فراہم کی جارہی ہے تاہم بعض زخمیوں کی حالت تشویشناک ہے۔
پولیس نے واقعے کی تحقیقات کا آغاز کردیا ہے جب کہ علاقے میں سیکیورٹی سخت کردی گئی ہے اور سرچ آپریشن بھی شروع کردیا گیا ہے۔
اسپتال انتظامیہ کے مطابق حملے میں زخمی ہونے والوں میں سے دو کی حالت تشویشناک ہے۔
واضح رہے کہ دہشت گردی کی ہلاکتوں کی ریکارڈ تعداد کے باوجود پاکستان میں 2025 میں دہشت گردی کے واقعات میں نمایاں اضافہ دیکھنے میں آیا، دہشت گرد حملوں میں سال بہ سال 34 فیصد اور دہشت گردی سے متعلقہ اموات میں 21 فیصد اضافہ ہوا۔ ایک سال کے دوران ملک بھر میں کل 699 دہشت گرد حملے ریکارڈ کیے گئے۔
اسلام آباد میں قائم پاک انسٹی ٹیوٹ فار پیس اسٹڈیز کے جاری کردہ اعداد و شمار کے مطابق، تشدد میں کم از کم 1,034 افراد ہلاک اور 1,366 زخمی ہوئے، جو 2021 میں افغانستان میں طالبان کے اقتدار میں آنے کے بعد سے انتہا پسندی کے بڑھتے ہوئے رجحان کی عکاسی کرتا ہے۔
اتوار کو خیبرپختونخوا کے اضلاع لکی مروت اور بنوں میں نامعلوم مسلح افراد کی فائرنگ سے تین ٹریفک پولیس اہلکاروں سمیت چار پولیس اہلکار شہید ہوگئے۔
مزید پڑھیں:میٹروپولیٹن نظام ختم، اسلام آباد میں نئے بلدیاتی ڈھانچے کا اعلان
