تہران (اے بی این نیوز) ایرانی حکام نے اعلان کیا ہے کہ معاشی دباؤ کم کرنے کے لیے ہر شہری کو ماہانہ مالیاتی الاؤنس دیا جائے گا۔
حکومتی ترجمان فاطمہ مہاجرانی نے سرکاری ٹی وی کو بتایا کہ ہر فرد کو ماہانہ 10 لاکھ تومان (تقریباً 7 امریکی ڈالر) کے برابر رقم دی جائے گی، جو چار ماہ کے لیے کریڈٹ کی صورت میں ان کے کھاتوں میں منتقل کی جائے گی۔
انہوں نے وضاحت کی کہ یہ رقم نقد کے بجائے کریڈٹ کی شکل میں ہوگی، جسے بعض ضروری اشیاء کی خریداری کے لیے استعمال کیا جاسکتا ہے اور اس کا مقصد “لوگوں پر معاشی دباؤ کو کم کرنا ہے۔” یہ سہولت تمام ایرانی شہریوں کو چار ماہ تک فراہم کی جائے گی۔
غیر ملکی خبر رساں ادارے کے مطابق ایران کی آبادی 85 ملین سے زائد ہے جہاں کم از کم ماہانہ اجرت تقریباً 100 ڈالر ہے جب کہ اوسط تنخواہ تقریباً 200 ڈالر ہے۔
ایران میں، زیادہ تر لوگ روزمرہ کی خریداری کے لیے نقد رقم کے بجائے موبائل فون اور ڈیبٹ کارڈز سے ادائیگی کرتے ہیں۔
گزشتہ ایک سال کے دوران ایرانی کرنسی امریکی ڈالر کے مقابلے میں اپنی قدر کا ایک تہائی سے زیادہ کھو چکی ہے جس کی وجہ سے لوگوں کی قوت خرید میں زبردست کمی آئی ہے اور ملک بھر میں بے چینی بڑھ رہی ہے۔
ایران میں اقتصادی بے یقینی اور کرنسی کی قدر میں کمی کے خلاف گزشتہ ہفتے سے مظاہرے جاری ہیں۔ سرکاری اعلانات اور میڈیا رپورٹس کے مطابق یہ مظاہرے کم از کم 40 شہروں تک پھیل چکے ہیں۔
سرکاری اطلاعات کے مطابق ان مظاہروں کے دوران سکیورٹی اہلکاروں سمیت کم از کم 12 افراد ہلاک ہو چکے ہیں۔
مزید پڑھیں:اثاثےمنجمد کرنے کا بڑا اعلان
