لاہور(اے بی این نیوز) پاکستان تحریک انصاف کی پرتشدد سیاسی حکمت عملی کے باعث کئی رہنما پی ٹی آئی کو خیرباد کہنے لگے، لاہور میں استحکام پاکستان نے پی ٹی آئی کی بڑی وکٹ گرا دی۔
استحکام پاکستان پارٹی کے سربراہ عبدالعلیم خان نے اپنے حلقہ این اے 117 لاہور کا دورہ کیا جہاں کو آرڈینیٹر این اے117میاں خالد محمود نے ان کا استقبال کیا، سربراہ استحکام پاکستان پارٹی نے این اے 117 میں پارٹی سیکرٹریٹ کا افتتاح کیا۔
اس موقع پر سابق رکن پنجاب اسمبلی خالد گجر کے صاحبزادے اور تحریک انصاف پی پی 145 کے اہم رہنما جواد خالد گجر نے عبدالعلیم خان سے ملاقات کی اور آئی پی پی میں شمولیت کا اعلان کر دیا، انہوں نے سربراہ استحکام پاکستان پارٹی کی پالیسیوں اور سیاسی حکمت عملی پر مکمل اعتماد کا اظہار کیا۔
اس موقع پر شرکاء سے خطاب میں عبدالعلیم خان نے کہا کہ بدتہذیبی اور گالم گلوچ کی سیاست نہیں ہونی چاہیے، سیاست میں عزت و احترام سب پر واجب ہے، اب سیاست کرنے کا نہیں، عوام کی خدمت اور مسائل کے حل کا وقت ہے، اپنی صفوں میں اتحاد برقرار رکھیں، سب کو ساتھ لے کر چلیں گے۔
عبدالعلیم خان نے این اے117 میں ترقیاتی فنڈز کی فراہمی پر وزیر اعظم شہباز شریف اور وزیر اعلیٰ پنجاب مریم کا خصوصی شکریہ ادا کرتے ہوئے کہا گزشتہ برس حلقے میں 4 گرلزاسکول بنائے،رواں سال مزید 10 سکول بنائیں گے، این اے 117 کے علاقے کو ترقی یافتہ علاقوں کے ہم پلہ بنائیں گے، جب تک اس حلقے کے مسائل حل نہیں ہو جاتے سکون سے نہیں بیٹھیں گے۔
آئی پی پی سربراہ کا کہنا تھا کہ ہم نے اپنے وسائل سے این اے 117 میں 50 واٹر فلٹریشن پلانٹس لگوائے، ماؤں اور بہنوں کے لئے فری ڈسپنسریاں بنوا رہے ہیں، اس علاقے کی بہتری اور عوام کے مسائل کے لئے حل جہاں بھی جانا پڑا ضرور جاؤں گا۔
قبل ازیں آئی پی پی سربراہ عبدالعلیم خان کی شاہدرہ آمد پر پارٹی رہنماؤں اور کارکنان نے ان کا پُرتپاک استقبال کیا ، سابق صوبائی وزیر اور کو آرڈینیٹر این اے117میاں خالد محمود نے اپنے خطاب میں وعدے پورے کرنے پر عبدالعلیم خان کا شکریہ ادا کیا، صوبائی نائب صدر میاں جنید ذوالفقار، ملک احمد حسن اور چودھری امجد رفیق دیگر بھی اس موقع پر موجود تھے۔
مزید پڑھیں۔سونے کی قیمت میں ایک بار پھر بڑی کمی
