امریکا (اوصاف نیوز) سابق ایئر مارشل نور خان کی صاحبزادی اور معروف طبی ماہر پروفیسر ڈاکٹر فائقہ قریشی امریکا میں ٹریفک حادثے میں جاں بحق ہوگئیں۔
خاندانی اور سوشل میڈیا ذرائع کے مطابق ڈاکٹر فائقہ کی گاڑی کو حادثہ اچانک پیش آیا تاہم امریکی حکام کی جانب سے ابھی تک واقعے کی تفصیلات جاری نہیں کی گئیں۔
ڈاکٹر فائقہ قریشی پیڈیاٹرک ایمرجنسی میڈیسن کی ایک ممتاز پروفیسر تھیں اور اپنے شعبے میں پیشہ ورانہ مہارت، شفقت اور تدریسی خدمات کے لیے انتہائی قابل احترام تھیں۔
ان کی موت پر طبی برادری اور پاکستانی کمیونٹی میں گہرے رنج و غم کا اظہار کیا جا رہا ہے۔
امریکہ میں کنگز ڈٹرز کے چلڈرن ہسپتال نے بھی ڈاکٹر فائقہ قریشی کی وفات پر گہرے رنج و غم کا اظہار کرتے ہوئے انہیں ایک مخلص اور قابل اطفال طبیب قرار دیا۔
ڈاکٹر فائقہ کے والد، ایئر مارشل (ر) نور خان، پاکستان کے ایک ممتاز رہنما تھے جنہوں نے سول ایوی ایشن، کھیلوں اور دیگر اہم شعبوں بشمول پاک فضائیہ کے سربراہ کی حیثیت سے نمایاں خدمات انجام دیں۔
مزید پڑھیں:پی ٹی آئی ارکان اسمبلی کا اڈیالہ پولیس کے خلاف تحریک استحقاق لانے کا فیصلہ
