اسلام آباد (اے بی این نیوز) سینئر سیاستدان محمد علی درانی نے کہا ہے کہ موجودہ سیاسی مذاکرات ایک مثبت پیش رفت ہیں اور امید کی جا رہی ہے کہ ان سے عوام اور پارٹیوں کے لیے مفاہمت کے قابل نتائج نکلیں گے۔
اے بی این نیوز کے پروگرام تجزیہ میںگفتگو کرتے ہوئے محمد علی درانی نے کہا کہ اس موقع پر حکومت اور اپوزیشن دونوں سے درخواست کی کہ مذاکرات کے دوران کسی بھی فریق کو نقصان پہنچانے والے اقدامات نہ کیے جائیں، اور یہ عمل عوام اور پارٹی کارکنان کے لیے قابل قبول ہونا چاہیے۔
انہوں نے کہا کہ حکومت کو چاہیے کہ وہ آئینی اصلاحات اور سابقہ ناانصافیوں کے حل پر توجہ دے اور صرف قیادی رہائی یا بیانات تک محدود اقدامات نہ کرے۔ انہوں نے مزید کہا کہ مذاکرات میں اہم سیاسی رہنما جیسے میاں نواز شریف، آصف زرداری اور عمران خان کی شمولیت ضروری ہے تاکہ مسئلہ حقیقی معنوں میں حل ہو سکے۔
محمد علی درانی نے یہ بھی زور دیا کہ مذاکرات میڈیا کے سامنے نہ ہوں بلکہ ٹریک ٹو ڈپلومیسی کے ذریعے بھی کیے جا سکتے ہیں تاکہ اپوزیشن کو اعتماد حاصل ہو اور عوام میں مثبت تاثر جائے۔
انہوں نے کہا کہ ماضی کے تجربات سے سبق لینا چاہیے اور مذاکرات کے نتائج تب ہی واضح ہوں گے جب تمام فریقین عملی اقدامات کریں گے اور غیر ضروری تنازعات سے گریز کریں گے۔
مزید پڑھیں:الیکشن کمیشن نے کوئٹہ میں بلدیاتی انتخابات ملتوی کر دیئے
