کچا (اے بی این نیوز) سندھ پنجاب سرحد کے کچے کے علاقوں میں پولیس کا ڈاکوؤں کے خلاف آپریشن جاری ہے، پولیس کی فائرنگ سے مزید 3 ڈاکو مارے گئے۔
آپریشن میں ہلاک ہونے والے ڈاکوؤں کی تعداد 6 ہو گئی ہے جب کہ 6 روز میں اب تک 6 مغویوں کو بازیاب کرایا گیا ہے۔
گھوٹکی میں گزشتہ ہفتے بس سے 15 مسافروں کے اغوا کے بعد مختلف اضلاع کے کچے کے علاقوں میں ڈاکوؤں کے خلاف آپریشن جاری ہے۔
سندھ پنجاب کے سرحدی علاقوں راجن پور اور گھوٹکی سمیت کچا کراچی، کچا جمال اور دیگر علاقوں میں پولیس کی جانب سے ڈاکوؤں کے خلاف بھرپور کارروائیاں جاری ہیں۔
ڈی پی او محمد عمران کے مطابق پولیس کی فائرنگ سے مزید 3 ڈاکو ہلاک جب کہ متعدد شدید زخمی ہوگئے۔
پولیس نے ڈاکوؤں کی کشتی کو ڈرون حملے سے نشانہ بنایا، اور اس میں سوار ڈاکوؤں کے مارے جانے کی اطلاعات ہیں۔
ادھر خیرپور میں دریائے سندھ کے کنارے کچے کے جنگلات میں سرچ آپریشن کے دوران ڈاکوؤں کے ٹھکانوں کو آگ لگا دی گئی، 12 مطلوب ملزمان کو گرفتار کر کے اسلحہ بھی برآمد کر لیا گیا۔
مزید پڑھیں:افسوسناک خبر، جانی نقصان کی اطلاعات
