نئی دہلی (اے بی این نیوز) بھارتی کرکٹ میں بدعنوانی کا ایک اور سکینڈل سامنے آیا ہے، جہاں مبینہ طور پر مشکوک سرگرمیوں میں ملوث ہونے پر چار کرکٹرز کو معطل کر دیا گیا ہے۔
آسام کرکٹ ایسوسی ایشن (اے سی اے) نے سخت کارروائی کرتے ہوئے امت سنہا، ایشان احمد، امان ترپاٹھی اور ابھیشیک ٹھاکر پر کرکٹ کھیلنے پر پابندی لگا دی ہے۔
اطلاعات کے مطابق یہ فیصلہ جمعہ کو سید مشتاق علی ٹرافی 2025 کے دوران ان کھلاڑیوں کی سرگرمیوں کو مشکوک قرار دینے کے بعد کیا گیا۔
اے سی اے کا کہنا ہے کہ ابتدائی تحقیقات سے ایسے شواہد ملے ہیں کہ مذکورہ کھلاڑی نہ صرف خود مشکوک سرگرمیوں میں ملوث تھے بلکہ وہ آسام ٹیم کے دیگر کھلاڑیوں کو بھی بدعنوانی میں ملوث کرنے کی کوشش کر رہے تھے۔
معاملے کو سنگین قرار دیتے ہوئے ایسوسی ایشن نے ریاستی پولیس کی کرائم برانچ میں چاروں کھلاڑیوں کے خلاف باضابطہ ایف آئی آر درج کرائی ہے۔ قانونی کارروائی مکمل ہونے تک ان کھلاڑیوں پر کرکٹ کی ہر قسم کی سرگرمیوں میں حصہ لینے پر پابندی برقرار رہے گی۔
معطلی کے بعد امیت سنہا، ایشان احمد، امان ترپاٹھی اور ابھیشیک ٹھاکر نہ تو آسام کی سطح پر کسی ٹورنامنٹ میں کھیل سکیں گے اور نہ ہی وہ آسام کرکٹ ایسوسی ایشن، اس کی ضلعی اکائیوں یا کسی بھی الحاق شدہ کلب کے ذریعے منعقد ہونے والے میچوں میں حصہ لے سکیں گے۔
مزید پڑھیں:پی ایس ایل عالمی سطح پر متعارف
