امریکا (اے بی این نیوز) امریکا میں افغان شہریوں کے حوالے سے تشویشناک انکشاف سامنے آیا ہے جہاں تقریباً 2 ہزار افغان باشندوں کے دہشت گرد تنظیموں سے روابط ہیں۔
یہ بات نیشنل انٹیلی جنس کی ڈائریکٹر تلسی گبارڈ نے امریکی میڈیا کو دیے گئے انٹرویو میں کہی۔
تلسی گبارڈ نے بائیڈن انتظامیہ کے دوران امریکہ آنے والے افغان شہریوں کی اسکریننگ کے سست اور غیر موثر عمل پر کڑی تنقید کی۔ انہوں نے کہا کہ آپریشن ایلی ویلکم کے تحت کل 18,000 افغان شہری امریکا میں داخل ہوئے لیکن اس دوران مناسب اور جامع اسکریننگ نہیں کی گئی۔
انہوں نے کہا کہ موجودہ مرحلے میں آپریشن ایلی ویلکم کے تحت آنے والے ہر افغان شہری کا بغور جائزہ لیا جا رہا ہے اور تمام متعلقہ ادارے اس سلسلے میں متحرک ہیں۔ تلسی گبارڈ کے مطابق ابتدائی تحقیقات سے یہ بات سامنے آئی ہے کہ امریکہ آنے والے 18000 افغان شہریوں میں سے تقریباً 2000 کے دہشت گرد تنظیموں سے براہ راست یا ممکنہ روابط ہیں۔
نیشنل انٹیلی جنس کے ڈائریکٹر نے خبردار کیا کہ داعش اور دیگر دہشت گرد تنظیمیں امریکی سرزمین پر مسلسل حملوں کی منصوبہ بندی کر رہی ہیں اور یہ گروہ امریکہ میں ایسے لوگوں کی تلاش میں ہیں جو اپنے مقاصد کو آگے بڑھا سکیں۔ انہوں نے کہا کہ اسی وجہ سے اس دھمکی کو بہت سنجیدگی سے لیا جا رہا ہے۔
تلسی گبارڈ نے انٹرویو کے دوران یہ بھی کہا کہ گزشتہ چند سالوں میں غیر قانونی طور پر امریکہ میں داخل ہونے والوں کی تعداد میں بھی نمایاں اضافہ ہوا ہے جو کہ قومی سلامتی کے لیے ایک اور بڑا چیلنج بنتا جا رہا ہے۔
مزید پڑھیں:پولیس اہلکاروں نےتاجر سے 2 کروڑ چھین لیے،ملزمان گرفتار
