راولپنڈی (اے بی این نیوز) سابق پاکستانی کپتان بابر اعظم نے ایک اور اعزاز اپنے نام کر لیا۔
بابر اعظم پاکستان کی جانب سے بین الاقوامی میچوں میں سب سے زیادہ کیچ لینے والے کھلاڑی کے طور پر سابق کپتان شاہد آفریدی کو پیچھے چھوڑ گئے ہیں۔
بابر اعظم نے یہ اعزاز سری لنکا کے خلاف راولپنڈی میں سہ ملکی ٹی ٹوئنٹی سیریز کے فائنل میں کوسل مینڈس کا کیچ لے کر حاصل کیا۔
فائنل میچ میں بابر اعظم نے 3 کیچز لے کر اپنے کیریئر میں 170 انٹرنیشنل کیچ لینے والے شاہد آفریدی کو پیچھے چھوڑ دیا جنہوں نے اپنے کیرئیر میں 167 کیچز لیے۔
فہرست میں پہلے نمبر پر سابق کپتان یونس خان ہیں جنہوں نے 281 کیچز لیے۔ دوسرے نمبر پر سابق کپتان انضمام الحق ہیں جنہوں نے اپنے کیرئیر میں 194 کیچز لیے جب کہ شاہد آفریدی تیسرے سے چوتھے نمبر پر چلے گئے ہیں۔
اس کے علاوہ بابر اعظم سری لنکا کے خلاف ٹی ٹوئنٹی سیریز کے آخری میچ میں 3 کیچ لے کر ٹی ٹوئنٹی فارمیٹ میں پاکستان کی جانب سے سب سے زیادہ کیچ لینے والے فیلڈر بن گئے ہیں۔
بابر اعظم نے فخر زمان کو پیچھے چھوڑ کر 60 کیچز لے کر پہلی پوزیشن حاصل کر لی ہے جبکہ فخر زمان 57 کیچز کے ساتھ دوسرے اور شعیب ملک 50 کیچز کے ساتھ تیسرے نمبر پر ہیں۔
مزید پڑھیں:سبی میں زلزلے کے جھٹکے
