اسلام آباد (اے بی این نیوز) پرتھ ٹیسٹ سے قبل گالف کھیلنے کے بعد کمر کی انجری کے تنازع کے بعد آسٹریلوی بلے باز عثمان خواجہ خود کو ایک اور مشکل میں پھنس گئے۔
آسٹریلوی میڈیا کے مطابق عثمان خواجہ اس بار اپنے فاؤنڈیشن لنچ میں پرتھ ٹیسٹ کی پچ پر نامناسب تبصروں پر مشکل میں پڑ گئے ہیں۔
عثمان خواجہ نے آئی سی سی کی جانب سے ‘بہت اچھی’ قرار دی گئی پچ کے بارے میں نامناسب الفاظ استعمال کیے تھے۔
اس حوالے سے کرکٹ آسٹریلیا کا موقف ہے کہ عثمان خواجہ کو عوامی سطح پر اس قسم کے تبصرے کرنے کا اختیار نہیں ہے۔
آسٹریلوی میڈیا کے مطابق پرتھ ٹیسٹ کی پچ پر نامناسب تبصرے پر کرکٹ آسٹریلیا عثمان خواجہ سے وضاحت طلب کرے گا۔ کرکٹ آسٹریلیا برسبین ٹیسٹ سے قبل باضابطہ وضاحت طلب کر سکتا ہے اور اگر ضروری سمجھا گیا تو کرکٹر کے خلاف ضابطہ اخلاق کے تحت کارروائی کی جائے گی۔
واضح رہے کہ عثمان خواجہ کو ایشز سیریز کے برسبین ٹیسٹ سے قبل فٹنس ٹیسٹ پاس کرنا ہوگا۔ عثمان خواجہ کو پرتھ ٹیسٹ سے قبل گالف کھیلتے ہوئے کمر درد میں مبتلا ہونے پر شدید تنقید کا سامنا کرنا پڑا تھا جس کی وجہ سے وہ پرتھ ٹیسٹ میں اوپننگ نہیں کر پائے تھے۔
بعد ازاں سابق کرکٹرز اور ماہرین نے عثمان خواجہ کو ڈراپ کرنے کا مطالبہ کیا تاہم 4 دسمبر سے شروع ہونے والی ایشز سیریز کے ڈے اینڈ نائٹ برسبین ٹیسٹ کے لیے عثمان خواجہ کو ٹیم میں برقرار رکھا گیا ہے۔
مزید پڑھیں:ایف بی آر نومبر میں ٹیکس وصولی کا ہدف حاصل کرنے میں ناکام
