کراچی (اے بی این نیوز) پاکستانیوں کے ویزوں کی بندش کی خبروں کے حوالے سے اماراتی قونصل جنرل کا اہم بیان سامنے آگیا ہے۔
اماراتی قونصل جنرل بخیت عتیق الرمیتی نے کہا ہے کہ پاکستان اور متحدہ عرب امارات کے تعلقات مضبوط بنیادوں پر ہیں، ویزوں کی بندش سے متعلق خبروں میں کوئی صداقت نہیں۔
اماراتی قونصل جنرل بخیت عتیق الرمیتی نے اے آر وائی نیوز سے گفتگو کرتے ہوئے کہا کہ اماراتی ویزے پاکستانیوں کو بغیر کسی رکاوٹ کے جاری کیے جا رہے ہیں، سازشی عناصر متحدہ عرب امارات کے ویزوں کی بندش کی افواہیں پھیلا رہے ہیں۔
انہوں نے کہا کہ کراچی میں ایشیا کے سب سے بڑے ویزا سینٹر میں پاکستانی بھائیوں اور بہنوں کی خدمت کے لیے اسٹاف کو تفویض کیا گیا ہے، اور مخصوص قسم کے ویزوں کے اجرا کے لیے پہلے کی تاریخ ضروری ہے۔
قونصل جنرل نے کہا کہ علاج معالجے، تعلیمی سیمینارز اور اس نوعیت کی دیگر خدمات کے لیے ہمارا تعاون بدستور جاری ہے۔
مزید پڑھیں:پی سی بی نے پی ایس ایل کی دو نئی ٹیموں کیلئے بڈنگ فیس مقرر کر دی
