راولپنڈی (اے بی این نیوز) سہ ملکی ٹی ٹوئنٹی سیریز کے تیسرے میچ میں پاکستان نے سری لنکا کو 7 وکٹوں سے شکست دے دی۔

راولپنڈی میں کھیلے گئے میچ میں گرین شرٹس نے 129 رنز کا ہدف 15.3 اوورز میں 3 وکٹوں کے نقصان پر حاصل کرلیا۔

اوپننگ بلے باز صاحبزادہ فرحان نے صرف 45 گیندوں پر 80 رنز کی ناقابل شکست اننگز کھیلی، اس دوران انہوں نے 6 چوکے اور 5 چھکے لگائے۔

دیگر کھلاڑیوں میں صائم ایوب 20، بابر اعظم 16 اور کپتان سلمان علی آغا صفر پر پویلین لوٹ گئے، عثمان خان 5 رنز بنا کر ناٹ آؤٹ رہے۔

سری لنکا کی جانب سے چمیرا نے 2 اور شانکا نے 1 وکٹ حاصل کی، محمد نواز کو میچ میں بہترین کارکردگی پر بہترین کھلاڑی قرار دیا گیا۔

سری لنکا نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر 128 رنز بنائے۔

سری لنکا کی جانب سے جینت لیاناگے 41 رنز بنا کر ناٹ آؤٹ رہے جبکہ کوشل پریرا نے 25 اور کامل مشرا نے 22 رنز بنائے۔

گرین شرٹس کی جانب سے محمد نواز نے 3، سلمان مرزا، فہیم اشرف اور ابرار احمد نے ایک ایک وکٹ حاصل کی۔

ٹاس جیتنے کے بعد سری لنکن کپتان کا کہنا تھا کہ وکٹ بیٹنگ کے لیے اچھی لگ رہی تھی۔

فاسٹ بولر شاہین شاہ آفریدی پیر کی انجری کے باعث آج کے میچ میں قومی ٹیم کا حصہ نہیں تھے۔

سلمان علی آغا نے ٹاس کے وقت کہا تھا کہ شاہین آفریدی کی جگہ محمد وسیم جونیئر کو فائنل الیون کا حصہ بنایا گیا ہے۔

پاکستانی ٹیم میں صاحبزادہ فرحان، صائم ایوب، بابر اعظم، فخر زمان، عثمان خان، محمد نواز، فہیم اشرف، ابرار احمد، محمد وسیم جونیئر، اور سلیمان مرزا شامل تھے۔

سری لنکن ٹیم میں کامندو مینڈس، ونندو ہسرنگا، دشمنتھا چمیرا، ایشان ملنگا، وجے کانتھا وشواناتھن شامل تھے۔
مزید پڑھیں‌:بنگلہ دیش : ایک بار پھر زلزلے کے جھٹکے