اسلام آباد( اے بی این نیوز) ڈیزل سے چلنے والی پرانی گاڑیاں فضائی آلودگی کا سب سے بڑا ذریعہ بن گئی ہیں۔
پاکستان انوائرمنٹل پروٹیکشن ایجنسی کی ایک رپورٹ میں اسلام آباد میں فضائی آلودگی میں اضافے کی نشاندہی کی گئی ہے۔
اس حوالے سے جاری رپورٹ کے مطابق اسلام آباد میں 20 فیصد ہیوی گاڑیاں ماحولیاتی معیارات کی خلاف ورزی کرتی ہوئی پائی گئیں، ہر پانچ میں سے ایک بھاری گاڑی قابل قبول حد سے تجاوز کرتی ہے۔
پاک ای پی اے اور اسلام آباد ٹریفک پولیس کی مشترکہ کارروائیاں 28 اور 30 اکتوبر کو ہوئیں۔ سیکٹر I-11 اور سری نگر ہائی وے پر گاڑیوں کے دھوئیں اور شور کو چیک کیا گیا۔
مجموعی طور پر 100 گاڑیوں کا معائنہ کیا گیا، 20 فیصد نے ماحولیاتی معیار کی خلاف ورزی کی، 20 غیر معیاری گاڑیوں کو جرمانے اور 3 انتہائی آلودگی پھیلانے والی گاڑیوں کو ضبط کیا گیا۔
رپورٹ میں ماحولیاتی معیارات کے مطابق گاڑیوں کے فٹنس سرٹیفکیٹ سسٹم کا جائزہ لینے کی سفارش کی گئی ہے۔
مزید پڑھیں:ایئرپورٹ سیکیورٹی فورس کا پشاور اور ملتان ایئرپورٹس پر چرس اور آئس اسمگلنگ کے خلاف آپریشن
