لاہور (اے بی این نیوز) پنجاب میں ہونے والے بلدیاتی انتخابات کے حوالے سے پاکستان تحریک انصاف (پی ٹی آئی) کے لیے بڑا مسئلہ کھڑا ہو گیا ہے۔

ذرائع کے مطابق پاکستان تحریک انصاف (پی ٹی آئی) اپنے امیدوار کھڑے نہیں کر سکے گی کیونکہ اس کے پاس اس وقت انتخابی نشان نہیں ہے۔

ذرائع کا کہنا ہے کہ اگر پارٹی کے حمایت یافتہ امیدوار آزاد حیثیت سے کامیاب بھی ہوئے تو وہ بعد میں پی ٹی آئی میں شامل نہیں ہو سکیں گے۔ نئے بلدیاتی قانون کے تحت ہر منتخب کونسلر کو 30 دن کے اندر سیاسی جماعت میں شامل ہونا ضروری ہے بصورت دیگر وہ اپنی نشست کھو سکتے ہیں۔

واضح رہے کہ پاکستان تحریک انصاف (پی ٹی آئی) کے انٹرا پارٹی الیکشن کیس گزشتہ 19 ماہ سے الیکشن کمیشن میں زیر التوا ہے۔ پارٹی کی قانونی ٹیم نے کیس کو سلجھانے میں خاطر خواہ دلچسپی نہیں لی جس کی وجہ سے معاملہ ابھی تک حل نہیں ہو سکا۔

واضح رہے کہ الیکشن کمیشن نے لاہور ہائیکورٹ کے حکم امتناعی کے باعث اس کیس کی سماعت روک دی ہے۔

سیاسی تجزیہ کاروں کا کہنا ہے کہ اگر جلد فیصلہ نہ کیا گیا تو پاکستان تحریک انصاف بلدیاتی انتخابات سے موثر طور پر باہر ہو جائے گی جس کے پنجاب کی سیاسی صورتحال پر گہرے اثرات مرتب ہوں گے۔
مزید پڑھیں:افسوس کی بات ہے کہ افغانستان تمام احسانات بھول گیا، شاہد آفریدی