لاہور(اے بی این نیوز)کینٹ کچہری لاہور نے بانی پاکستان تحریک انصاف (پی ٹی آئی) کی رہائش گاہ کے باہر اسلام آباد پولیس پر مبینہ حملے کے مقدمے میں پی ٹی آئی کے سینئر رہنما شبلی فراز کے ناقابلِ ضمانت وارنٹ گرفتاری جاری کر دیئے اور انہیں گرفتار کر کے عدالت میں پیش کرنے کا حکم دیا ہے۔

مزید برآں، عدالت نے بانی پی ٹی آئی کو تیس جولائی کو عدالت میں طلب کر لیا ہے۔ اس سلسلے میں عدالت نے سمن نوٹس اڈیالہ جیل حکام کے نام جاری کر دیے تاکہ بانی پی ٹی آئی کو عدالت میں پیش کیا جا سکے۔

کیس کی سماعت جوڈیشل مجسٹریٹ سہیل رفیق نے کی، جس میں عدالت نے واضح کیا کہ ملزمان کی عدالت میں حاضری ضروری ہے۔ عدالت نے کیس کی مزید سماعت بھی 30 جولائی کو مقرر کر دی ہے۔یاد رہے کہ یہ مقدمہ تھانہ ریس کورس پولیس نے درج کر رکھا ہے، جس میں بانی پی ٹی آئی اور دیگر رہنماؤں پر الزام ہے کہ انہوں نے اسلام آباد پولیس پر حملے میں کردار ادا کیا۔
مزید پڑھیں: راولپنڈی بڑی تباہی سے بچ گیا،فتنہ الخوارج کا خطرناک دہشتگرد گرفتار