پشاور(اے بی این نیوز)خیبر پختونخوا اسمبلی میں سینیٹ الیکشن آج ہورہے ہیں، کے پی اسمبلی کے جرگہ ہال میں پولنگ کا عمل شام 5 بجے تک جاری رہے گا، ایوان بالا کی 11 نشستوں کے لیے حکومت اور اپوزیشن میں چھ پانچ کا فارمولا طے پاگیا تھا تاہم پی ٹی آئی کے ناراض ارکان کے دستبردار نہ ہونے سے بلامقابلہ انتخاب ممکن نہیں ہوسکا، پی ٹی آئی رات گئے 4 ناراض ارکان کو منانے میں کامیاب ہوگئی تھی لیکن خرم ذیشان کے دستبردارنہ ہونے پر پولنگ ہورہی ہے۔الیکشن کمیشن نے سینیٹ الیکشن سے متعلق نوٹی فیکیشن جاری کردیا، 11 نشستوں کے لیے 145 ووٹرز اپنا حقِ رائے دہی استعمال کررہے ہیں۔
جنرل نشستوں پر حکومت نے 4 جبکہ اپوزیشن نے 3 امیدوار میدان میں اتارے ہیں، خواتین اور ٹیکنوکریٹ کی نشستوں پر دونوں جانب سے 2،2 امیدوار قسمت آزمائی کر رہے ہیں۔
پی ٹی آئی نے جنرل نشستوں پر مراد سعید، فیصل جاوید، مرزا آفریدی اور پیر نورالحق قادری کو میدان میں اتارا ہے جبکہ خواتین کی نشست پر روبینہ ناز اور ٹیکنوکریٹ کے لیے اعظم سواتی پی ٹی آئی کے امیدوار ہیں۔
اپوزیشن کی جانب سے جنرل نشستوں پر مسلم لیگ (ن) کے نیاز احمد، پی پی کے طلحہٰ محمود اور جے یو آئی (ف) کے عطا الحق امیدوار ہیں، خواتین کی نشست پر پیپلز پارٹی کی روبینہ خالد جبکہ ٹیکنوکریٹ کی نشست پر جے یو آئی (ف) کے دلاور خان مقابلہ کررہے ہیں۔صوبائی اسمبلی میں حکومتی ارکان کو 92 جبکہ اپوزیشن کو 53 ارکان کی حمایت حاصل ہے۔
الیکشن کمیشن نے 2 اپریل 2024 کو مذکورہ انتخابات اسپیکر کی طرف سے مخصوص نشستوں پر منتخب ارکان اسمبلی کا حلف نہ ہونے اور الیکٹورل کالج نامکمل ہونے کی وجہ سے ملتوی کیے تھے۔
دوسری جانب سینیٹ الیکشن کے موقع پر میڈیا کو اسمبلی احاطہ میں جانے سے روک دیا گیا ہے، سرکاری اور نجی ٹی وی چینلز کو صوبائی اسمبلی میں جانے کی اجازت نہیں، اسمبلی کے سیکیورٹی انچارج کے مطابق میڈیا پر پابندی الیکشن کمیشن نے لگائی ہے۔
مزید پڑھیں: گردشی قرضہ ختم کرنے کیلئے 1275 ارب روپے کے قرض کی تقسیم ،حکومت تذبذب کا شکار
