پشاور (نیوز ڈیسک) قومی احتساب بیورو (نیب) نے 40 ارب روپے کوہستان کرپشن سکینڈل میں 5 اہم ملزمان کو گرفتار کرلیا۔
ذرائع کے مطابق نیب نے کوہستان کرپشن سکینڈل کیس میں کارروائی کرتے ہوئے 2 سرکاری افسر اور 3 ٹھیکیدار گرفتار کرلئے۔ ملزمان پرجعلی چیک، منی لانڈرنگ، اور بے نامی اکاؤنٹس کے ذریعے خوردبرد کا الزام ہے۔
سرکاری دستاویزات میں اہم انکشاف ہوا ہے کہ ڈسٹرکٹ اکاؤنٹ آفیسر کا مرکزی کردار ہے۔ اے جی آفس ملی بھگت سے فنڈز کا غیر قانونی استعمال کیا۔ کوہستان میگا اسکینڈل کی تحقیقات میں مزید گرفتاریاں بھی متوقع ہے۔
ملزمان نےجعلی بلنگ، جعلی تعمیراتی فرمز کے ذریعے اربوں کی ہیراپھیری کی۔ ملکی سالمیت، قومی اداروں کے وقار اور سماجی ہم آہنگی کے خلاف کسی بھی منفی پروپیگنڈے کو برداشت نہیں کیا جائے گا۔
یاد رہے سرکاری تفصیلات کے مطابق اس کیس میں اب تک مجموعی طور پر 25 ارب روپے مالیت کے اثاثے برآمد اور ضبط کئے ہیں، نیب نے ایک ارب روپے سے زائد نقد رقم، غیر ملکی کرنسی اور تین کلو گرام سے زیادہ سونا برآمد کیا ہے، مختلف کمرشل بینکوں میں موجود 73 بینک اکاؤنٹس بھی منجمد کر دیئے گئے ہیں جن میں 5 ارب روپے سے زیادہ رقم موجود ہے۔
سرکاری ریکارڈ کے مطابق نیب نے 77 لگژری گاڑیاں بھی ضبط کی ہیں، مزید برآں، 109 جائیدادیں بھی مختلف شہروں بشمول اسلام آباد، راولپنڈی، پشاور، ایبٹ آباد اور مانسہرہ سے قبضے میں لی گئی ہیں، ان میں 4 فارم ہاؤسز، 12 کمرشل پلازے، 2 کمرشل پلاٹس، 30 مکانات، 12 دکانیں اور فوڈ کورٹس، 25 فلیٹس اور پینٹ ہاؤسز اور 175 کنال زرعی اراضی شامل ہیں، ان جائیدادوں کی مجموعی مالیت تقریباً 17 ارب روپے بتائی جا رہی ہے۔
سرکاری ذرائع کے مطابق آئندہ 24 سے 48 گھنٹوں کے دوران اس کیس میں اہم شخصیات کی گرفتاری کا بھی امکان ہے جس کیلئے تیاریاں جاری ہیں، یہ بہت بڑا فراڈ انتہائی چالاکی سے اور واضح گٹھ جوڑ کے ساتھ رچایا گیا، جس میں سرکاری اہلکار، لالچی ٹھیکیدار، ملی بھگت کرنے والے بینک حکام اور دیگر شامل تھے۔
تمام ملزمان نے حیران کن دیدہ دلیری سے کام لیا، جس کے نتیجے میں اربوں روپے قومی خزانے سے چپ چاپ نکال لئے گئے، اور کسی مالیاتی نگرانی کے ادارے کو کانوں کان خبر تک نہ ہوئی۔ نیب نے کوہستان سکینڈل میں ملوث کنٹریکٹر محمد ایوب کو گرفتار کر لیا ہے، ملزم کے اکاؤنٹ میں تین ارب روپے ٹرانسفر ہوئے تھے۔
مزید پڑھیں:بھارت کی نئی سازش ،ایشیاکپ میں رکاوٹ ڈالنے کی کوشش
