اسلام آباد(اے بی این نیوز)نائب وزیراعظم اور وزیر خارجہ اسحق ڈار نے کہا ہے کہ خضدار حملہ ناقابل برداشت ہے، بھارتی پراکیسز باز آ جائیں۔سینٹ اجلاس میں اظہار خیال کرتے ہوئے اسحق ڈار کا کہنا تھا کہ بھارت کو اپنی شکست سے سبق سیکھنا چاہیے، دہشتگردی کے مسئلے پر بیٹھ کر لائحہ عمل طے کرنا ہو گا۔
انہوں نے کہا کہ اے پی ایس واقعہ میں بھی ہم نے دلخراش مناظر دیکھے، بلیم گیم میں نہیں پڑنا چاہتا، ماضی میں ہم نے بارڈرز کھول کر 40 ہزار لوگوں کو آنے دیا، یہاں دہشتگردوں کو لا کر بسایا گیا۔
انکا کہنا تھا کہ دورہ چین کے دوران دہشتگردی کا معاملہ زیر بحث آیا، پاکستان سمیت پورے خطے سے دہشتگردی کا خاتمہ ضروری ہے۔اس موقع پر اسحاق ڈار نے افریقہ فرینڈ شپ سے متعلق قرارداد پیش کرتے ہوئے کہا کہ افریقی ممالک نے اپنی آزادی کی کامیاب تحریکیں چلائیں، پاکستان افریقی ممالک کی آزادی کی تحریک کی حمایت کرتا ہے۔
انہوں نے مزید کہا کہ پاکستان اقوام متحدہ کی امن فورس کا اہم رکن ہے، پاکستان امن دستوں نے افریقہ میں قیام امن کیلئے اہم کردارادا کیا، روانڈا، گھانا، ایوری کوسٹ سمیت مختلف ممالک میں افریقی برادرز کی خدمت کی، 25 مئی کو پاکستان افریقہ دوستی کے دن کے طورپر منایا جائے گا۔
مزید پڑھیں: قطر نے عید الاضحی کے موقع پر 5 دن کی سرکاری تعطیلات کا اعلان کردیا
