اسلام آباد(اے بی این نیوز)معرکہ حق آپریشن “ بُنْيَانٌ مَّرْصُوْصٌ“ کی کامیابی اور بھارت کے خلاف عظیم فتح کے اعتراف میں ملک بھر میں یوم تشکر منایا جا رہا ہے۔وفاقی دارالحکومت اسلام آباد میں 31 اور صوبائی دارالحکومتوں میں 21،21 توپوں کی سلامی سے دن کا آغاز ہوا، اسکے دوران فضا ”اللہ اکبر“ اور ”پاکستان زندہ باد“ کے نعروں سے گونج اٹھی۔
لاہور میں 21 توپوں کی سلامی دی گئی، صوبائی دارلحکومت پشاور کے کرنل شیر خان شہید اسٹیڈیم میں بھی 21 توپوں کی سلامی دی گئی جبکہ صوبائی دارالحکومت گلگت میں پاک فوج کی جانب سے 21 توپوں کی سلامی دی گئی۔
ملک بھر میں دن کا آغاز مساجد میں قرآن خوانی اور خصوصی دعاؤں سے ہوا، نماز فجر کے بعد مساجد میں ملک کی ترقی، خوشحالی اور سلامتی کے لئے خصوصی دعائیں مانگی گئیں۔کراچی میں مزار قائد اور لاہور میں علامہ اقبال کے مزار پر گارڈز کی تبدیلی کی پروقار تقریب منعقد کی جائیگی، پرچم کشائی کی تقریبات وفاقی اور صوبائی دارالحکومتوں میں منعقد کی جائیں گی۔
یوم تشکر کی نمایاں تقریب کل رات پاکستان مونومنٹ اسلام آباد میں منعقد ہوگی، تقریب میں تمام مکاتب فِکرسے تعلق رکھنے والی اہم شخصیات شرکت کرینگی، تقریب کے مہمان خصوصی وزیراعظم ہونگے جبکہ چیئرمین جوائنٹ چیفس آف اسٹاف کمیٹی اور مسلح افواج کے سربراہ بھی تقریب کا حصہ ہونگے۔
مزید پڑھیں: حکومت کا پیٹرول کی قیمت برقرار رکھنے کا فیصلہ
