ڈی آئی خان (نیوز ڈیسک )خیبرپختونخوا کے ضلع ڈیرہ اسماعیل خان میں نامعلوم مسلح افراد کی فائرنگ سے بلوچستان لیویز کے 4 اہلکاروں سمیت 5 افراد شہید ہوگئے ہیں۔
ذرائع کے مطابق پشین کے علاقے خانوزئی کی حدود سے 13 جنوری کو ٹرک چوری ہوا، ڈی آئی خان پولیس نے پشین میں لیویز حکام سے رابطہ کرکے بتایا کہ چوری شدہ ٹرک ڈی آئی خان میں ہے۔بلوچستان لیویز فورس کے اہلکار گزشتہ روز ٹرک کی برآمدگی کے سلسلے میں ڈیرہ اسماعیل خان جارہے تھے کہ ڈی آئی خان کی تحصیل درابن کے قریب ان پر دہشتگردوں نے حملہ کیا۔
دہشتگردوں نے پہلے لیویز اہلکاروں کی گاڑی پر فائرنگ کی، جس کے نتیجے میں بلوچستان لیویز کے تمام اہلکار شہید ہوگئے۔اسسٹنٹ کمشنر کاریزات کے مطابق، جس وقت حملہ ہوا اس وقت لیویز فورس کا ایک جوان اپنے موبائل فون پر اپنے گھر والوں سے بات کررہا تھا۔ پشین میں لیویز حکام کو اسی لیے دھماکے کی فوری اطلاع موصول ہوئی۔
دوسری جانب مقامی پولیس کا کہنا ہے کہ مقتولین سرکاری گاڑی میں اسلام آباد جارہے تھے، واقعے کی تحقیقات اور ملزمان کی گرفتاری کے لیے کارروائیاں جاری ہے۔لیویز حکام کے مطابق جاں بحق اہلکاروں کی شناخت نائب رسالدار نور احمد، سپاہی رشید زمان، سپاہی داؤد خان اور سپاہی بلال احمد کے نام سے ہوئی۔واضح رہے کہ گزشتہ روز بلوچستان کے ضلع قلات کے علاقے منگوچر میں میں سیکیورٹی فورسز نے کارروائی کرتے ہوئے 13 دہشتگردوں کو ہلاک کردیا تھا۔ آپریشن کے دوران سیکیورٹی فورسز کے 18 جوانوں نے جام شہادت نوش کیا تھا۔
مزید پڑھیں: فالج سے متاثرہ لڑکی کاعلاج کرنے گھر آئے جعلی پیر کی مریضہ سے مبینہ زیادتی
