کرم ( نیوز ڈیسک )حکومت نے علاقے کو خوراک اور ادویات فراہم کرنے والے امدادی قافلے پر مہلک حملے کے بعد لوئر کرم میں دہشت گردوں کے خلاف آپریشن شروع کرنے کا فیصلہ کیا ہے۔
اس سلسلے میں ڈپٹی کمشنر (ڈی سی) کرم نے ہفتہ کو ایک نوٹیفکیشن جاری کیا۔ڈی سی نے متعلقہ محکمے کو ٹل اور ہنگو میں مختلف مقامات پر کیمپ لگانے کے لیے بھی خط لکھا ہے تاکہ آپریشن کے نتیجے میں بے گھر ہونے والے افراد کو رہائش فراہم کی جا سکے۔مراسلے میں ڈی سی نے ہدایت کی ہے کہ گورنمنٹ گرلز ڈگری کالج ٹل، ٹیکنیکل کالج اور ریسکیو 1122 کی عمارت کے اندر کیمپ لگائے جائیں۔
ضلعی انتظامیہ نے کہا ہے کہ ایک کمیٹی بھی تشکیل دی گئی ہے جس کی سربراہی ایڈیشنل ڈپٹی کمشنر کریں گے۔امدادی قافلے کے چار لاپتہ ڈرائیوروں کی مسخ شدہ لاشیں جمعے کو لوئر کرم کے علاقے اروالی سے ملی ہیں، جس کے بعد علاقے میں سامان لانے والے قافلے پر حملے میں ہلاک ہونے والوں کی تعداد 10 ہوگئی ہے۔
اس حملے نے شمال مغربی کرم میں مقامی تاجروں کو چاول، آٹا اور کھانا پکانے کا تیل فراہم کرنے کے لیے 33 گاڑیوں کے قافلے اور دو امدادی گاڑیوں کو نشانہ بنایا جو ضروری ادویات لے کر جا رہے تھے۔پولیس کے مطابق ہلاک ہونے والے چار ڈرائیور ان چھ افراد میں شامل تھے جنہیں جمعرات کو باغان میں قافلے پر حملے کے بعد اغوا کیا گیا تھا۔لاشوں کو شناخت اور قانونی کارروائی کے لیے اسپتال منتقل کردیا گیا۔ بعد ازاں پولیس نے بتایا کہ مقتولین کی لاشوں کی شناخت کر لی گئی ہے اور چاروں لاپتہ ڈرائیور تھے اور ان کی پشت پر ہاتھ باندھ کر گولیاں ماری گئی تھیں۔
دوسری جانب طوری بنگش قبیلے کے رہنما جلال بنگش نے واقعے کی مذمت کرتے ہوئے کہا ہے کہ حکومت کو انصاف کی فراہمی کے لیے تین دن کا وقت دیا گیا ہے، دہشت گردوں کے خلاف کارروائی نہ کی گئی تو آئندہ کا لائحہ عمل طے کریں گے۔انہوں نے کہا کہ باغان میں ہر تیسرے دن دہشت گردی کے واقعات ہورہے ہیں اور حکومت کی خاموشی اس وقت معنی خیز ہے جب لاکھوں لوگ محاصرے میں ہیں۔
کرم کئی دہائیوں سے تشدد کی لپیٹ میں ہے، لیکن نومبر میں شروع ہونے والی لڑائی کے ایک تازہ دور میں تقریباً 150 افراد ہلاک ہو چکے ہیں اور اس نے اس خطے کو بڑی حد تک بیرونی دنیا سے منقطع کر دیا ہے۔ایک مقامی پولیس افسر نے نام ظاہر نہ کرنے کی شرط پر اے ایف پی کو بتایا کہ گھات لگا کر ہلاک ہونے والوں میں “دو سکیورٹی اہلکار، چار ڈرائیور اور چار شہری شامل ہیں۔
انہوں نے کہاکہ اس کے علاوہ، ایسی اطلاعات ہیں کہ پانچ سے چھ ڈرائیوروں کو ایک مقامی قبیلے نے اغوا کر لیا ہے۔” انہوں نے مزید کہا کہ جوابی حملے میں چھ عسکریت پسند مارے گئے ہیں۔خیبرپختونخوا حکومت اور قبائلی رہنماؤں نے متحارب برادریوں کے درمیان متعدد جنگ بندی کی بات کی ہے لیکن کسی نے بھی تشدد کو نہیں روکا۔
ایک مقامی حکومتی اہلکار نے بھی نام ظاہر نہ کرنے کی شرط پر بتایا، ’’علاقے کی صورتحال انتہائی غیر مستحکم ہے۔‘‘تازہ ترین امن معاہدے کا اعلان یکم جنوری کو کیا گیا تھا لیکن اس کے کچھ ہی دنوں بعد علاقے کی طرف جانے والے امدادی قافلے پر بھی حملہ کیا گیا، جس میں کئی مقامی اہلکار اور ان کے حفاظتی دستے کے ارکان زخمی ہوئے۔
قبائلیوں کے درمیان مذاکرات کے لیے صوبائی حکومت کے امن ایلچی کو لے جانے والا ایک ہیلی کاپٹر بھی اس سے قبل فائرنگ کی زد میں آ چکا ہے۔
مزید پڑھیں: ویرات کوہلی چیمپئنز ٹرافی سے قبل گردن کی انجری کا شکار
