اسلام آباد(نیوز ڈیسک )صدر آصف علی زرداری نے جسٹس یحییٰ آفریدی کو پاکستان کا اگلا چیف جسٹس مقرر کردیا ہے، جو موجودہ چیف جسٹس قاضی فائز عیسیٰ سے باگ ڈور سنبھالیں گے۔

بدھ کی صبح ایوان صدر سے جاری ہونے والے ایک بیان کے مطابق جسٹس آفریدی کو 26 اکتوبر سے شروع ہونے والی تین سال کی مقررہ مدت کے لیے تعینات کیا گیا ہے۔بیان میں مزید کہا گیا کہ یہ تقرری آئین کے آرٹیکل 175A(3)، 177 اور 179 کے مطابق کی گئی ہے، جسٹس آفریدی 26 اکتوبر کو اپنے عہدے کا حلف اٹھائیں گے۔اس سے قبل خصوصی پارلیمانی کمیٹی نے جسٹس یحییٰ آفریدی کو پاکستان کا اگلا چیف جسٹس نامزد کیا تھا۔

یہ کمیٹی 26ویں ترمیم کے بعد بنائی گئی تھی اور اس میں قومی اسمبلی اور سینیٹ دونوں کے نمائندے شامل تھے۔ جس میں ایم این ایز خواجہ آصف، احسن اقبال، شائستہ پرویز ملک، راجہ پرویز اشرف، سید نوید قمر، رانا انصار، گوہر علی خان، صاحبزادہ محمد حامد رضا اور سینیٹرز فاروق حمید نائیک، اعظم نذیر تارڑ، سید علی ظفر اور کامران مرتضیٰ شامل تھے۔ تنازع میں دو دیگر ججز جسٹس منصور علی شاہ اور منیب اختر تھے۔ سبکدوش ہونے والے چیف جسٹس قاضی فائز عیسیٰ 25 اکتوبر کو ریٹائر ہو جائیں گے۔
مزید پڑھیں: پولیو سے نمٹنے کے لیے نیشنل ایمرجنسی ایکشن پلا ن کا آغاز