کراچی(نیوز ڈیسک )اینٹی نارکوٹکس فورس (اے این ایف) نے شپنگ کنٹینر سے آلو میں چھپائی گئی بھاری مقدار میں ہیروئن برآمد کرلی، جسے کولمبو، سری لنکا بھیجا جانا تھا۔

اے این ایف ترجمان کے مطابق اینٹی نارکوٹکس فورس نے کراچی انٹرنیشنل کنٹینر ٹرمینل پر بڑی کارروائی کرتے ہوئے آلو سے بھرے کنٹینر سے بھاری مقدار میں ہیروئن برآمد کر لی۔

اے این ایف نے بتایا کہ کل 5 کلو گرام ہیروئن کو مہارت کے ساتھ 122 آلوؤں میں چھپایا گیا تھا جو 1,198 تھیلوں میں پیک کیا گیا تھا۔ کل 80 تھیلوں میں سے 1 سے 2 ہیروئن سے بھرے آلو ہر تھیلے میں مہارت سے چھپائے گئے تھے۔

اے این ایف کے ترجمان نے مزید کہا کہ انہوں نے ایک ملزم کو گرفتار کرلیا ہے مزید ملزمان کی گرفتاری کے لیے چھاپے جاری ہیں۔گرفتار ملزم کو اے این ایف تھانے منتقل کر کے مزید تفتیش شروع کر دی گئی ہے۔