لاہور(نیوز ڈیسک )تحریک لبیک پاکستان (ٹی ایل پی) کے نائب امیر پیر ظہیر الحسن شاہ کے خلاف چیف جسٹس آف پاکستان (سی جے پی) قاضی فائز عیسیٰ کو جان سے مارنے کی دھمکی دینے پر مقدمہ درج کر لیا گیا۔
پولیس کے مطابق مقدمے میں ٹی ایل پی کے 1500 کارکنوں کو بھی نامزد کیا گیا ہے جب کہ مقدمے میں انسداد دہشت گردی ایکٹ، مذہبی منافرت، بغاوت اور عدلیہ پر دباؤ ڈالنے کی دفعات شامل کی گئی ہیں۔
پولیس نے بتایا کہ مقدمے میں اعلیٰ عدلیہ کی توہین، حکومت میں مداخلت اور قانونی فرائض میں رکاوٹ ڈالنے کی دفعات بھی شامل ہیں۔
پولیس کی جانب سے یہ بھی بتایا گیا ہے کہ پریس کلب کے باہر احتجاج کر کے پیر ظہیر نے سپریم جوڈیشری کے خلاف نفرت پھیلائی جس پر ٹی ایل پی کے وائس چیئرمین سمیت 1500 کارکنوں کے خلاف مقدمہ درج کر لیا گیا ہے۔
لاہور پولیس نے سٹیشن ہاؤس آفیسر (ایس ایچ او) حماد حسین کی شکایت پر تھانہ قلعہ گجر سنگھ میں مقدمہ درج کر لیا۔
مزید پڑھیں: فواد خان کی برزخ سیریز ،مردوں کا بوسہ دینے کا منظر،تنقید کی زد میں
