پارا چنار(نیوزڈیسک) پارا چنار سے پشاور جانیوالی مسافر کوچ اور کار پر دہشتگردوں کاحملہ، خاتون اور سکیورٹی اہلکاروں سمیت 5افراد جاں بحق جبکہ 3 زخمی ہو گئے۔پولیس کے مطابق مسلح افراد نے پارا چنار سے پشاور جانے والی ایک کار اور ایک فلائنگ کوچ کو نشانہ بنایا، فائرنگ کے نتیجے میں خاتون سمیت 5 افراد موقع پر دم توڑ گئے جبکہ 3 افراد شدید زخمی ہوئے ہیں جنہیں ہسپتال منتقل کردیا گیا ۔حملہ آوروں نے پاراچنار سے پشاور جانے والی دو گاڑیوں کو نشانہ بنایا،ڈی پی او کرم محمد عمران کہنا تھا کہ صدہ بازار کے قریب کوسٹر اور کار پر فائرنگ کا واقعہ پیش آیا، فائرنگ سے 4 افراد جاں بحق اور 3 زخمی ہوگئے۔ فائرنگ سے گاڑی کا ڈرائیور، 2 سیکورٹی اہلکار اور ایک خاتون جاں بحق ہوئی۔ڈی پی او کرم محمد عمران نے بتایا کہ حملہ آوروں کی گرفتاری کی کوشش کی جارہی ہے ، علاقے میں سکیورٹی سخت کردی ۔کرم میں گزشتہ کئی ماہ سے مسافر گاڑیوں پر حملوں کا سلسلہ جاری ہے جن میں اب تک متعدد افراد جاں بحق ہو چکے ہیں۔دہشتگردی کے واقعات کے خلاف طوری بنگش قبائل نے ہنگامی جرگہ طلب کر لیا ہے جس میں دہشتگردی کے واقعات کے حوالے سےقومی طور پر لائحہ عمل تیار کیا جائے گا۔