اسلام آباد ( اے بی این نیوز)اسلام آباد میں اڈیالہ جیل میں قید پاکستان تحریک انصاف کے بانی عمران خان نے اپنے ایکس (سابق ٹوئٹر) اکاؤنٹ سے مبینہ طور پر خلافِ قانون مواد اپ لوڈ کیے جانے کے معاملے پر تفتیشی اداروں سے تعاون کرنے سے انکار کر دیا ہے۔
ذرائع کے مطابق نیشنل سائبر کرائم انویسٹی گیشن ایجنسی نے اسلام آباد ہائی کورٹ کو آگاہ کیا ہے کہ بانی پی ٹی آئی ایکس اکاؤنٹ سے متعلق جاری تحقیقات میں تعاون نہیں کر رہے اور انہوں نے یہ بتانے سے انکار کر دیا ہے کہ ان کے سوشل میڈیا اکاؤنٹس کون چلا رہا ہے۔
این سی سی آئی اے نے اڈیالہ جیل میں عمران خان سے تفتیش کے حوالے سے اپنا مؤقف باضابطہ طور پر پیش کر دیا۔ رپورٹ میں بتایا گیا کہ بانی پی ٹی آئی کے ایکس اکاؤنٹ سے کی گئی بعض ٹوئٹس پر دو الگ الگ انکوائریز شروع کی جا چکی ہیں، جو 19 مئی اور 13 ستمبر 2024 کو رجسٹرڈ ہوئیں اور تاحال زیر التوا ہیں۔
نیشنل سائبر کرائم انویسٹی گیشن ایجنسی نے اسلام آباد ہائی کورٹ میں ایک تفصیلی رپورٹ بھی جمع کرائی ہے، جو ایکس اکاؤنٹ کی معطلی کے لیے دائر درخواست کے تناظر میں عدالت کے احکامات پر تیار کی گئی۔ اس رپورٹ میں عدالت کو تحقیقات میں اب تک کی پیش رفت اور اٹھائے گئے اقدامات سے آگاہ کیا گیا۔
تحقیقاتی ٹیم نے متعدد بار اڈیالہ جیل کا دورہ کیا تاکہ بانی پی ٹی آئی سے ان کے سوشل میڈیا اکاؤنٹس کو چلانے والے افراد کے بارے میں معلومات حاصل کی جا سکیں، تاہم اب تک یہ معلوم نہیں ہو سکا کہ ایکس پر موجود اس اکاؤنٹ کو کون آپریٹ کر رہا ہے۔
مزید پڑھیں :آئندہ 48 گھنٹوں میں کہاں کہاں برفبار ی ہو گی،جا نئے پیشین گوئی
