اسلام آباد(نیوزڈیسک) عالمی مالیاتی ادارے آئی ایم ایف پروگرام میں تاخیر کے باعث آئندہ مالی سال کے بجٹ کا شیڈول متاثر ہونے کا امکان ہے۔ آئندہ مالی سال2023-24کیلئے جی ڈی پی سمیت تخمینہ جات کو حتمی شکل دینے کیلئے سالانہ پلان کوآرڈینیشن کمیٹی کے دو اجلاس اب تک ملتوی ہوچکے ہیں۔این اے سی کا اجلاس اب پیر جبکہ سالانہ پلان رابطہ کمیٹی کا اجلاس دو جون کو دوبارہ طلب کرلیا گیا ہے۔،وزارت خزانہ ذرائع کے مطابق غیر یقینی سیاسی صورتحال اور آئی ایم ایف پروگرام میں تاخیر کے باعث بجٹ کا شیڈول بھی متاثر ہونے کا خدشہ ہے کیونکہ نہ تو اعدادوشمار فائنل ہو پا رہے نہ ہی اگلے مالی سال کیلئے بجٹ تخمینہ کو ابھی تک حتمی شکل دی جاسکی۔ قومی اقتصادی کونسل کا اجلاس جون کے پہلے ہفتے میں ہوگا۔نیشنل اکاؤنٹس کمیٹی کا اجلاس دوبار ملتوی ہوچکا۔آئندہ مالی سال کے بجٹ میں زراعت، صنعت، خدمات سمیت مختلف شعبوں کی کارکردگی بنیاد پر اہداف کا تعین کیا جائے گا، بجٹ سٹریٹجی پیپر کی کابینہ سے اگلے ہفتے منظوری متوقع ہے۔
