دبئی (اے بی این نیوز)متحدہ عرب امارات میں یکم جولائی سے پیٹرولیم مصنوعات کی قیمتوں میں نمایاں کمی کا اعلان کردیا گیا ہے۔
اماراتی حکام کی جانب سے جاری کردہ نئی قیمتوں کے مطابق سپر 98 پیٹرول کی قیمت 3.95 درہم سے کم ہو کر 3.40 درہم فی لیٹر، اسپیشل 95 کی قیمت 3.83 درہم سے گھٹ کر 3.29 درہم فی لیٹر جبکہ ای پلس 91 کی قیمت 3.76 درہم سے کم ہو کر 3.21 درہم فی لیٹر مقرر کردی گئی ہے۔
اسی طرح ڈیزل کی قیمت بھی 4.33 درہم سے کم ہو کر 3.60 درہم فی لیٹر ہوگئی ہے۔
ایندھن کی قیمتوں میں مسلسل اضافے کے باعث گزشتہ تقریباً تین ماہ کے دوران متعدد شہریوں نے اپنے سفری معمولات میں تبدیلیاں کی تھیں۔ کئی خاندانوں نے ایک کے بجائے صرف ایک گاڑی استعمال کرنا شروع کردی تھی جبکہ بعض افراد نے روزانہ کے سفر میں میٹرو سے بھی مدد لی تاکہ ایندھن پر آنے والے اخراجات کم کیے جاسکیں۔
شارجہ کے علاقے النہدہ میں مقیم سلیمان شیخ، جو روزانہ ملازمت کے سلسلے میں البرشا آتے جاتے ہیں، کا کہنا ہے کہ نئی قیمتوں کے بعد انہیں ماہانہ تقریباً 235 درہم تک کی بچت ہوسکتی ہے۔ انہوں نے بتایا کہ مہنگے ایندھن کے باعث وہ بعض اوقات اپنی گاڑی میٹرو اسٹیشن پر پارک کرکے باقی سفر میٹرو کے ذریعے مکمل کرتے تھے، تاہم اب امید ہے کہ انہیں ایسا کم کرنا پڑے گا۔
دوسری جانب دبئی کے علاقے جے ایل ٹی میں رہائش پذیر رئیل اسٹیٹ کے شعبے سے وابستہ فراز ابو حمدان کا کہنا ہے کہ ان کے خاندان نے بھی گزشتہ چند ماہ کے دوران ایک گاڑی گھر پر ہی کھڑی رکھنا معمول بنالیا تھا۔ ان کے مطابق نئی قیمتوں سے انہیں ہر ماہ تقریباً 240 درہم کی بچت متوقع ہے، جسے وہ موسمِ گرما کی تعطیلات اور دیگر گھریلو ضروریات پر خرچ کریں گے۔
اسی طرح دبئی کے علاقے الغرہود کے رہائشی فضل حسین، جو رینج روور استعمال کرتے ہیں، کا کہنا ہے کہ وہ گزشتہ دو ماہ کے دوران ایندھن پر تقریباً 900 درہم ماہانہ خرچ کررہے تھے، تاہم نئی قیمتوں کے بعد انہیں تقریباً 125 درہم ماہانہ بچانے کا موقع ملے گا۔
شہریوں کا کہنا ہے کہ اگرچہ قیمتوں میں کمی سے ان کے بجٹ میں کوئی بڑی تبدیلی نہیں آئے گی، تاہم روزمرہ سفر نسبتاً آسان اور کم خرچ ہوجائے گا۔ ان کا کہنا ہے کہ گزشتہ چند ماہ میں انہوں نے غیرضروری سفر کم کیے، خریداری اور دیگر کام ایک ہی چکر میں نمٹانے کی کوشش کی اور ایندھن کی بچت کو اپنی روزمرہ زندگی کا حصہ بنالیا۔
متحدہ عرب امارات کے شہریوں اور تارکین وطن نے امید ظاہر کی ہے کہ آنے والے مہینوں میں بھی پیٹرولیم مصنوعات کی قیمتوں میں کمی کا سلسلہ جاری رہے گا، جس سے مہنگائی کے دباؤ میں مزید کمی اور گھریلو اخراجات کو متوازن رکھنے میں مدد ملے گی۔
مزید پڑھیں: ریٹائرڈ ملازمین کو پنشن کارڈ جاری کیے جائیں گے، میئر کراچی
