کراچی (اے بی این نیوز)دبئی سے سستا آئی فون منگوانے کا ارادہ رکھنے والے صارفین کے لیے بری خبر سامنے آگئی۔ ایپل نے متحدہ عرب امارات میں اپنی متعدد مصنوعات کی قیمتوں میں نمایاں اضافہ کر دیا ہے، جس کے بعد خدشہ ظاہر کیا جا رہا ہے کہ رواں سال متوقع آئی فون 18 پرو سیریز بھی پہلے سے زیادہ قیمت پر لانچ کی جا سکتی ہے۔

ایپل کے متحدہ عرب امارات کے آن لائن اسٹور پر 26 جون کو نئی قیمتوں کا اطلاق کیا گیا، جن کے مطابق بعض میک بک ماڈلز کی قیمتوں میں ایک ہزار درہم سے زائد اضافہ کیا گیا ہے۔ 13 انچ میک بک ایئر کی قیمت 4,599 درہم سے بڑھ کر 5,499 درہم جبکہ 15 انچ ماڈل کی قیمت 5,499 درہم سے بڑھ کر 6,299 درہم کر دی گئی ہے۔ اسی طرح 14 انچ میک بک پرو کی قیمت 7,199 درہم سے بڑھ کر 8,499 درہم تک پہنچ گئی ہے۔

ایپل کے چیف ایگزیکٹو آفیسر ٹم کک کے مطابق میموری اور اسٹوریج چپس کی بڑھتی ہوئی لاگت، محدود سپلائی اور مسلسل طلب کے باعث قیمتوں میں اضافہ ناگزیر ہو گیا ہے۔ کمپنی نے اشارہ دیا ہے کہ یہی رجحان دنیا بھر میں میک بک، آئی پیڈ اور دیگر مصنوعات پر بھی لاگو ہوگا۔

مارکیٹ تجزیہ کاروں کا کہنا ہے کہ قیمتوں میں حالیہ اضافے کے اثرات آنے والی آئی فون 18 پرو سیریز پر بھی پڑ سکتے ہیں۔ اطلاعات کے مطابق نئے پرو ماڈلز میں 12 جی بی ریم، اے 20 پرو چپ، بڑی بیٹری، زیادہ روشن ڈسپلے، ویری ایبل اپرچر کیمرا، نئی نسل کا سی 2 موڈیم اور آئی او ایس 27 کے ساتھ جدید مصنوعی ذہانت پر مبنی فیچرز شامل کیے جا سکتے ہیں، جس سے تیاری کی لاگت مزید بڑھنے کا امکان ہے۔

ماہرین کے مطابق اگر یہ اندازے درست ثابت ہوئے تو آئی فون 18 پرو کی ابتدائی عالمی قیمت 1,249 سے 1,299 امریکی ڈالر جبکہ آئی فون 18 پرو میکس کی قیمت 1,349 سے 1,399 امریکی ڈالر کے درمیان ہو سکتی ہے۔ متحدہ عرب امارات میں ان ماڈلز کی قیمتیں بالترتیب تقریباً 5,400 سے 5,500 درہم اور 5,800 سے 5,900 درہم تک پہنچنے کا امکان ظاہر کیا جا رہا ہے۔

تاہم ایپل نے ابھی تک آئی فون 18 سیریز کی قیمت، خصوصیات یا لانچ کی تاریخ کی باضابطہ تصدیق نہیں کی۔ مختلف صنعتی رپورٹس کے مطابق نئی آئی فون سیریز ستمبر میں متعارف کرائے جانے کا امکان ہے۔
مزید پڑھیں: پانی پاکستان کی بقا کا معاملہ،کسی قسم کا سمجھوتہ نہیں کیا جائے گا،حکومت