کراچی (اے بی این نیوز)کراچی سمیت ملک کے مختلف شہروں میں ٹماٹر کی قیمتوں میں غیر معمولی اضافہ دیکھنے میں آیا ہے، بعض ریٹیل مارکیٹوں میں ٹماٹر 560 روپے فی کلو تک فروخت ہو رہا ہے۔
قومی اخبار میں شائع رپورٹ کے مطابق ٹماٹر کی قیمتوں میں زبردست اضافہ دیکھنے میں آیا ہے، ریٹیل مارکیٹوں میں نرخ 560 روپے فی کلوگرام تک پہنچ گئے ہیں۔
تاہم، ہول سیل تاجروں کا کہنا ہے کہ ریٹیلرز ہول سیل قیمت سے دوگنا یا اس سے بھی زیادہ وصول کر رہے ہیں، جو اس وقت 250 سے 300 روپے فی کلوگرام کے درمیان ہے، بڑھتی ہوئی قیمتوں کے باعث صارفین کم مقدار میں خریداری پر مجبور ہیں اور اکثر صرف 250 گرام لے رہے ہیں تاکہ فوری ضرورت پوری ہو سکے۔
فلاحی انجمن ہول سیل ویجیٹیبل مارکیٹ سپر ہائی وے کے صدر حاجی شاہ جہان نے بتایا کہ ہول سیل مارکیٹ میں ٹماٹروں کی قلت کی وجہ سے قیمتوں میں اضافہ ہوا ہے۔
ان کے مطابق بلوچستان کی فصل ختم ہونے کے قریب ہے، جب کہ ایران سے آنے والے ٹماٹروں کی آمد بھی بہت کم ہے، پاکستان اور افغانستان کے درمیان کشیدہ سرحدی حالات کے باعث افغانستان سے ٹماٹروں کی ترسیل کا امکان بھی نہ ہونے کے برابر ہے اور سندھ سے نئی فصل آئندہ ماہ آنے کی توقع ہے۔
مزیدپڑھیں: سوات اور گردونواح میں زلزلے کے جھٹکے،عوام میں خوف وہراس
