کراچی (اے بی این نیوز)میئر کراچی مرتضیٰ وہاب نے کراچی کے تمام نادرا مراکز میں یونین کونسلز کاؤنٹرز قائم کرنیکا اعلان کیا ہے۔ لانڈھی کے بابربازار میں نادرا کے نئے اپ گریڈڈ رجسٹریشن سینٹر کے افتتاح کے موقع پر مرتضیٰ وہاب نے کہا کہ لیاری کے کاکری گراؤنڈ میں ایک نیا نادرا مرکز قائم کرنے کےلئے فوری طور پر فزیبلٹی سٹڈی شروع کی جا رہی ہے
جبکہ گلشن اقبال، گلبرگ اور سرجانی ٹاؤن میں بڑے میگا مراکز بھی زیر تعمیر ہیں جو بڑی آبادیوں کو خدمات فراہم کرینگے۔ مرتضیٰ وہاب نے کہا کہ لانڈھی کا نیا اپ گریڈڈ مرکز سات سنگل ونڈو کاؤنٹرز پر مشتمل ہے جو پہلے صرف چار تھے
اس کی گنجائش بڑھا کر 120 افراد تک کر دی گئی ہے اور یہاں خواتین و مرد حضرات کے لئے علیحدہ واش رومز، وہیل چیئر رسائی اور پینے کے پانی کی سہولت بھی فراہم کی گئی ہے۔
نادرا سندھ کے ڈائریکٹر جنرل عامر علی خان نے کہا کہ کراچی کے پانچ مراکز پہلے ہی اپ گریڈ کئے جا چکے ہیں، جبکہ شہر کے 21 مراکز کو مرحلہ وار اپ گریڈ کیا جائے گا۔ عامر علی خان نے کہا کہ نادرا کے نئے موبائل ایپ کے آغاز میں شہریوں کو کچھ مسائل کا سامنا ہوا، تاہم مکمل فعال ہونے کے بعد یہ ایپ شہریوں کو طویل اعرصے تک آسانی فراہم کرے گی۔
نادرا سندھ کے ڈائریکٹر نے کہا کہ شہریوں کی سہولت کے لیے یونین کونسل کاؤنٹرز، اپ گریڈڈ مراکز اور نئے میگا سنٹرز کی بدولت نادرا کی خدمات کراچی میں مزید تیز اور مؤثر انداز میں فراہم کی جا سکیں گی۔
مزید پڑھیں: بھارت نے دریائے ستلج میں پانی چھوڑ دیا،حکومت نےالرٹ جاری
