اہم خبریں

شاہ عبدالطیف بھٹائی کا 282 واں عرس،9 اگست کو چھٹی کا اعلان،نوٹیفکیشن جاری

کراچی (اے بی این نیوز) صوبائی حکومت نے سندھ بھر میں 9 اگست کو عام تعطیل کا اعلان کرتے ہوئے باضابطہ نوٹیفکیشن بھی جاری کر دی۔تفصیلات کے مطابق سندھ حکومت نے صوفی شاعر حضرت شاہ عبدالطیف بھٹائیؒ کے 282 ویں سالانہ عرس کی مناسبت سے 9 اگست بروز ہفتہ کو صوبے بھر میں عام تعطیل کا اعلان کر دیا ہے، عام تعطیل کا باضابطہ نوٹیفکیشن بھی جاری کر دیا گیا ہے۔

سیکریٹری ثقافت سندھ محمد خان کلہوڑو نے بتایا کہ تین روزہ عرس کی تقریبات کا آغاز 9 اگست سے ہوگا، جس کے لیے تیاریاں مکمل کر لی گئی ہیں۔

وزیر ثقافت نے گورنر سندھ کو عرس کی افتتاحی تقریب میں شرکت کی باضابطہ دعوت بھی دی ہے، عرس میں ملک بھر سے ہزاروں زائرین، اسکالرز اور شاہ لطیفؒ کے عقیدت مندوں کی شرکت متوقع ہے۔ڈپٹی کمشنر حیدرآباد نے عرس کے دوران اسلحہ کی نمائش پر پابندی کا حکم بھی جاری کر دیا ہے تاکہ تقریب کے دوران پرامن ماحول کو یقینی بنایا جا سکے۔

حضرت شاہ عبدالطیف بھٹائیؒ کا عرس ہر سال بھٹ شاہ میں واقع ان کے مزار پر منایا جاتا ہے۔ یہ سندھ کے اہم ترین روحانی و ثقافتی میلوں میں شمار ہوتا ہے، جس میں صوفی موسیقی، کلامِ لطیف کی محفلیں، علمی و ادبی نشستیں اور دعاؤں کا خصوصی اہتمام کیا جاتا ہے۔ یہ میلہ محبت، امن اور رواداری کے پیغام کو عام کرنے کا ذریعہ سمجھا جاتا ہے۔
مزید پڑھیں: مانچسٹر ،کرکٹر حیدر علی گرفتاری کے بعد ضمانت پر رہا

متعلقہ خبریں