اسلام آباد(نیوز ڈیسک) وفاقی وزیرخزانہ ومحصولات سینیٹرمحمداسحاق ڈارنے کہاہے کہ سودسے پاک بینکاری نظام اورمعیشت کے قیام کیلئے حکومت بھرپورتعاون فراہم کررہی ہے،تمام شراکت دار مل کر کرپوری کوششیں کریں گے توکوئی وجہ نہیں کہ وفاقی شرعی عدالت کے دئیے گئے 5 سال کے نظام الاوقات سے قبل سود سے پاک بینکاری اورمعیشت کو استوارکیا جاسکتاہے، ملک کی بدقسمتی ہے کہ 5 سال کے تجربوں نے ہمیں 24 ویں سے 47 ویں معیشت بنادیاہے۔انہوں نے یہ بات جمعرات کو نیشنل اسلامک اکنامک فورم سے خطاب میں کہی۔وزیرخزانہ نے فورم کے انعقاد پرمفتی منیب الرحمان اوران کے ساتھیوں کودل کی گہرائیوں سے مبارکباد پیش کی اورکہاکہ پاکستان میں اسلامی نظام معیشت کے لائحہ عمل ایک ایسا موضوع ہے جوان کے دل کے قریب ہے اوران کی خواہش ہے کہ جلد پیارے ملک میں سود کاخاتمہ ہو ۔وزیرخزانہ نے کہاکہ سود سے پاک معیشت اوربینکاری کے قیام کے نیک مقصد کے حصول کیلئے حکومت سمیت سب کو اپنا کردار ادا کرنا چاہیے۔انہوں نے کہاکہ 17-2013میں جب وہ وزیرخزانہ تھے توانہوں نے اس حوالے سے اقدامات کئے تھے۔ ڈپٹی گورنر سٹیٹ بینک سعید احمد کویہ چیلنج اورذمہ داری دلوائی جنہوں نے اپنا کام کیا اورمیں دیکھ رہاہوں کہ وہ آج بھی اپنا کام کررہے ہیں۔انہوں نے کہاکہ اس وقت حکومت جتنی تیزی سے کام کرسکتی تھی وہ کام کئے گئے ، ٹیکس کے مسائل حل کئے گئے، سیکیورٹیزاینڈ ایکسچینج کمیشن کے حوالہ سے اقدامات کئے گئے، وزارت خزانہ میں اعلیٰ افسر کی قیادت میں ونگ قائم کیا گیا۔فنانس ایکٹ 2016 میں اسلامی بینکاری کے حوالہ سے شریعہ کمپلائنس بیلنس شیٹس رکھنے والی کمپنیوں کودوفیصد کی رعایت دی گئی۔ وزیرخزانہ نے کہاکہ سود سے پاک نظام کیلئے ایک کمیٹی قائم کی گئی ہے جس کی سربراہی گورنرسٹیٹ بینک کررہے ہیں، مجھے تجویز دی گئی کہ میں اس میں شامل ہوں، کمیٹی کاپہلا اجلاس ہوچکاہے اورہم اس کوتیزی سے آگے لیکرچلیں گے، اللہ سے دعاہے کہ ہم نے جونیت کی ہے اللہ ہمیں کامیابی دے۔ہماری نیت اللہ کی خوشنودی ہے، میں سمجھتاہوں کہ یہ ثواب دارین ہے ۔انہوں نے کہاکہ سیلانی ویلفئیرٹرسٹ کے چیئرمین اوران کے ساتھی بھی بہت احسن کام کررہے ہیں، وہ مسکینوں اورغریبوں کومفت کھانا دیتے ہیں اور ان کی مدد کرتے ہیں، اللہ انہیں ہمت دیں۔انشاء اللہ ہمارا تعاون حاضرہوں گا۔مجھے امید ہے کہ اللہ کے فضل وکرم سے پانچ سال سے کم عرصہ میں سود سے پاک نظام کیلئے کام مکمل ہوگا۔انہوں نے کہاکہ ہم سب امین ہے اوریہ ہمارافرض ہے کہ اس مقصد کو پورا کیا جائے اور اسی نظریہ کے ساتھ اپیلیں واپس لی گئی ہے۔