مہنگی بجلی کے بوجھ سے پریشان عوام کے لیے سندھ حکومت نے ایک اہم خوشخبری دی ہے، جس کے تحت مزید 5 لاکھ سولر پینلز عوام کو فراہم کیے جائیں گے۔
سندھ کے وزیر اعلیٰ مراد علی شاہ کے مطابق، چیئرمین پاکستان پیپلز پارٹی بلاول بھٹو زرداری نے کہا ہے کہ غریبوں پر مہنگی بجلی کا بوجھ نہیں ڈالا جا سکتا۔ اس مقصد کے لیے سولر پینلز فراہم کرنے کا فیصلہ کیا گیا ہے۔ انہوں نے کہا کہ اگرچہ ہمارے پاس وسائل کم تھے، لیکن عالمی بینک سے مدد لے کر اس پروگرام کا آغاز کیا گیا ہے۔
مراد علی شاہ نے مزید بتایا کہ سرکاری عمارتوں کے بجلی کے خرچ کو بچانے کے لیے انہیں سولر سسٹمز سے لیس کیا جائے گا، اور کراچی کی 35 سرکاری عمارتوں میں 18 میگا واٹ کے سولر سسٹمز نصب کیے جا چکے ہیں۔ وزیر اعلیٰ کا کہنا تھا کہ غریبوں کے لیے 2 لاکھ سولر سسٹمز کی منظوری دی گئی ہے، جن کی تقسیم سندھ کے مختلف اضلاع میں کی جائے گی۔ بلاول بھٹو نے کہا کہ صرف 2 لاکھ سولر پینلز سے اس مسئلے کا حل ممکن نہیں، لہٰذا سندھ حکومت نے مزید 5 لاکھ سولر پینلز دینے کی منظوری دی ہے۔ بلاول بھٹو کا کہنا ہے کہ 300 یونٹ تک مفت بجلی فراہم کرنے کا پروگرام بھی جاری ہے اور سندھ حکومت ان کی ہدایات کے مطابق کام کر رہی ہے۔
مزید برآں، مراد علی شاہ نے کچرے سے بجلی پیدا کرنے کے منصوبے کا بھی ذکر کیا اور کہا کہ یہ منصوبہ جلد شروع کیا جائے گا۔ انہوں نے کہا کہ تھر میں سستی بجلی پیدا ہو رہی ہے، حالانکہ مخالفین نہیں چاہتے تھے کہ وہاں کوئی منصوبہ شروع ہو۔
سڑکوں کی حالت پر بات کرتے ہوئے، مراد علی شاہ نے انڈس ہائی وے کی خراب صورتحال کا ذکر کیا اور کہا کہ وفاقی حکومت سے درخواست کی جا رہی ہے کہ اس سڑک کی تعمیر جلد مکمل کی جائے۔ انہوں نے بتایا کہ حالیہ ٹریفک حادثات میں لوگوں کی جانیں گئیں اور انڈس ہائی وے کی حالت 8 سال سے نہایت خراب ہے، جسے مکمل کرنے میں وفاقی حکومت کامیاب نہیں ہو سکی۔
