اسلام آباد( نیوز ڈیسک )اسلام آباد کو دنیا کے دیگر ممالک کے دارالحکومتوں کے برابر لانے کے لیے، وزیر داخلہ سید محسن نقوی نے جمعہ کو کچھ اہم فیصلوں کا اعلان کیا۔کیپیٹل ڈویلپمنٹ اتھارٹی (سی ڈی اے) کی عمارت میں ایک اجلاس کی صدارت کرتے ہوئے، وزیر نے کہا کہ اب اتھارٹی کے لیے صرف الیکٹرک بائیکس کی خریداری کو لازمی قرار دے دیا گیا ہے تاکہ ماحولیاتی آلودگی پر قابو پایا جا سکے۔
اسی طرح انہوں نے اعلان کیا کہ اب شہر کی سڑکوں پر الیکٹرک بسیں چلیں گی۔نقوی کے ایک اور فیصلے کے مطابق وفاقی دارالحکومت کے رہائشیوں کو بین الاقوامی معیار کی ہنگامی خدمات فراہم کی جائیں گی۔نقوی نے کہا کہ اب ایم سی آئی سی، سی ڈی اے نہیں، یہ خدمات فراہم کرے گا۔اسی طرح کیپٹل واسا کے نام سے محکمہ قائم کیا جائے گا جبکہ کیپٹل ویسٹ مینجمنٹ کمپنی کے قیام سے متعلق معاملات کو بھی حتمی شکل دی جائے گی۔
وزیر نے اجلاس کو بتایا کہ سرینا چوک انڈر پاس اور ایف نائن پارک چوک فلائی اوور پر جلد کام شروع ہو جائے گا۔ انہوں نے کہا کہ اسی طرح ایکسپریس وے پراجیکٹ پر کام کو تیز کیا جائے گا تاکہ اسے جلد از جلد مکمل کیا جا سکے۔انہوں نے کہا کہ اسلام آباد کی ماڈل جیل جو کہ گزشتہ 17 سالوں سے تکمیل کے منتظر تھی، پر کام تیزی سے جاری ہے اور منصوبے کا پہلا مرحلہ مقررہ مدت ختم ہونے سے قبل مکمل کر لیا جائے گا۔
وفاقی وزیر نے کہا کہ دارالحکومت میں کاروباری سہولتی مراکز بنائے جائیں گے جہاں سرمایہ کاروں کو ایک ہی چھت تلے سہولیات فراہم کی جائیں گی۔ انہوں نے بتایا کہ سیکٹر F-16 میں ہیلتھ ٹاور کی تعمیر کے لیے زمین الاٹ کی گئی ہے۔انہوں نے ریکارڈ ٹیکس وصولی کو یقینی بنانے پر سی ڈی اے کے چیئرمین اور ان کی ٹیم کے ارکان کو مبارکباد دی۔
نقوی نے کہا کہ کوئی بھی محکمہ محض پلاٹوں کی فروخت سے نہیں چلایا جا سکتا اور اس کے لیے محکمے کے اثاثوں کو بڑھانے کی ضرورت ہے۔انہوں نے متعلقہ حکام کو ہدایت کی کہ وہ سرمایہ کاری کا منصوبہ تیار کر کے سات دنوں میں انہیں پیش کریں۔
مزید پڑھیں: ماہر فلکیات نے محرم الحرام کے چاند بارے پیشگوئی کردی
