بھارت(اے بی این نیوز) بھارت میں ایک شخص کی دوسری شادی کی تقریب میں پہلی بیوی نے اسٹیج پر چڑھ کر ہنگامہ کھڑا کردیا۔
بھارتی میڈیا رپورٹ کے مطابق حیران کن واقعہ بھارتی ریاست اتر پردیش کے ضلع ’بستی‘ میں رواں ہفتے ہی پیش آیا، جہاں ونے آنند شرما نامی شخص کی شادی کی تقریب جاری تھی کہ اسی دوران ونے کی پہلی بیوی ریشما اپنے خاندان کے ساتھ اسٹیج پر آدھمکی۔
ریشما کا ونے پر الزام عائد کرتے ہوئے کہنا تھا کہ ونے قانونی طور پر اس کا شوہر ہے لیکن اس کے باوجود دوسری شادی کر رہا ہے، ریشما نے شادی میں شریک مہمانوں کو ونے کے ساتھ اپنی شادی کی تصاویر بھی دکھائیں اور دعویٰ کیا کہ ونے نے اس کے اکاؤنٹ سے بڑی رقم نکالی ہوئی ہے، حتیٰ کہ اس کے نام پر کار کی فنانسنگ بھی کی ہوئی ہے۔
بھارتی میڈیا کے مطابق ریشما اور ونے نے 2022 میں کورٹ میرج کی تھی، جس کے بعد دونوں خاندانوں کی موجودگی میں ان کی شادی کی تقریب کا انعقاد بھی کیا گیا تاہم شادی کے چند ماہ بعد ہی اختلافات سامنے آنے پر جوڑے کی جانب طلاق کا کیس دائر کردیا گیا، طلاق کی کارروائی جاری تھی، مگر قانونی طور پر دونوں میں اب تک طلاق نہیں ہوئی۔
میڈیا رپورٹ کے مطابق ونے حال ہی میں اپنے گاؤں واپس پہنچا تھا جہاں اس کے خاندان نے اس کے لیے دوسری شادی کی تمام تر تیاریاں کی ہوئی تھیں، ونے اہلخانہ کے ساتھ جب بارات لیکر پہنچا تو اس بات سے بے خبر تھا کہ اس کی دوسری شادی کی خبر اس کی پہلی اہلیہ ریشما کو ہو جائے گی اور وہ اہلخانہ کے ہمراہ تقریب میں پہنچ کر شادی رکوا دے گی۔
شادی کی تقریب میں ہونے والے ہنگامے کی اطلاع جب پولیس کو دی گئی تو پولیس دلہا سمیت دونوں فریقین کو تھانے لے گئی۔
پولیس کے مطابق ونے کی پہلی اہلیہ کی جانب سے دائر طلاق کا کیس ابھی زیر التوا ہے، جس کے باعث ونے کی دوسری شادی کا معاملہ بھی پہلی شادی کے ختم ہونے تک لٹک گیا۔
مزید پڑھیں۔آن لائن شاپنگ کرنے والوں کیلئے خطرے کی گھنٹی بج گئی
