دبئی (اے بی این نیوز)متحدہ عرب امارات میں مقیم ایک بنگلہ دیشی الیکٹریشن کی 12 سالہ لگن اور صبر نے بالآخر اسے زندگی بدل دینے والی خوشخبری دیدی، جب اس نے بگ ٹکٹ لاٹری میں ایک ارب 93 کروڑ روپے کا انعام جیت لیا۔
گلف نیوز کے مطابق ابوظبی میں کام کرنے والے ایک بنگلہ دیشی الیکٹریشن کی 12 سال کی مسلسل کوششوں کے بعد قسمت ان پر مہربان ہوگئی اور اس نے لاٹری میں 2 کروڑ 50 لاکھ درہم (تقریباً ایک ارب 93 کروڑ پاکستانی روپے) کی خطیر رقم جیت لی۔
43 سالہ محمد ناصر بلال گزشتہ 14 سال سے متحدہ عرب امارات میں مقیم ہیں اور وہ 2012 سے ہر مہینے ’بگ ٹکٹ‘ کی قرعہ اندازی میں حصہ لے رہے تھے۔بالآخر ان کی یہ مستقل مزاجی رنگ لے آئی، جب ابوظبی انٹرنیشنل ایئرپورٹ سے 24 جون کو خریدا گیا ان کا ٹکٹ نمبر 061080 قرعہ اندازی میں فاتح قرار پایا۔
قرعہ اندازی کے بعد ’بگ ٹکٹ‘ کے میزبان رچرڈ اور بشریٰ نے ناصر سے رابطہ کرنے کی متعدد کوششیں کیں، مگر ابتدائی طور پر وہ کامیاب نہ ہو سکے۔ تاہم بعد میں ٹیم نے انہیں یہ خوشخبری پہنچا دی، رقم جیتنے کے بعد ناصر بلال نے کہا کہ وہ اب تک اس پر یقین نہیں کر پا رہے۔
ان کا کہنا تھا کہ انہیں اب بھی یقین نہیں آرہا کہ یہ حقیقت ہے، وہ گزشتہ 12 سال سے ہر مہینے ٹکٹ خرید رہے تھے۔ انہوں نے مزید کہا کہ وہ ان 12 برسوں میں ہر بار یہی خواب آنکھوں میں لیے ٹکٹ خریدتے رہے اور بالآخر وہ دن آہی گیا۔
مزید پڑھیں: برازیل میں برکس سربراہی اجلاس میں بھارت کو ایک اور سفارتی دھچکا
