گجرات(نیوزڈیسک)صدر پی ٹی آئی پنجاب چوہدری پرویز الٰہی کے بیٹے چوہدری مونس الٰہی نے چوہدری شجاعت حسین کے بیٹوں پر الزام لگایا کہ انہوں نے اپنی پھوپھیوں کی گرفتاری کیلئے پنجاب پولیس کو ان کے گھروں پر پولیس کو بھجوایا ۔مونس الٰہی کے الزام پر ان کے کزن سالک حسین نے کہا خاندان کی عزت پی ٹی آئی کے ووٹوں کیلئے مت رولو، مائیں بہنیں سب کی سانجھی ہیں، برائے مہربانی گجرات میں عورت کارڈ نہکھیلا جائے۔چوہدری سالک نے کہا کاغذات نامزدگی جمع کروانے کیلئے امیدوار کا جانا ضروری نہیں، آپ کے پاس وکلا کی فوج موجود انہیں بھیج دیا ہوتا، سیاست کرو ذاتی عناد اور بے بنیاد الزامات مت لگاؤ۔چوہدری شجاعت کے بیٹے نے دعا دیتے ہوئے کہا اللہ کرے پرویز الٰہی کی مشکلات میں کمی آئے۔ اس وقت سابق وزیراعلیٰ پنجاب چوہدری پرویز الٰہی کرپشن کے مقدمات میں زیر حراست ہیں اس لیے ان کی جگہ ان کی اہلیہ نے ان کے قومی اسمبلی کی دو اور صوبائی اسمبلی کی 3 نشستوں سے کاغذات نامزدگی جمع کرائے۔اس دوران چوہدری پرویز الٰہی کی اہلیہ کی جانب سے یہ الزام بھی عائد کیا گیا کہ ان سے کاغذات نامزدگی چھیننے کی کوشش بھی کی گئی۔ دوسری جانب مونس الٰہی بھی کرپشن اور کک بیکس کے الزامات میں پولیس کو مطلوب ہیں اور پولیس نے انہیں بیرون ملک سے واپس لانے کے لیے اقدامات بھی شروع کر رکھے ہیں۔