اسلام آباد (نیوز ڈیسک) اسلام آباد خودکش دھماکے کا مقدمہ درج کرلیا گیا ،خودکش دھماکے کی ایف آئی آر اسلام آباد کے سیکٹر آئی ٹین فور میں درج کرلی گئی ہے، دھماکے کی ایف آئی آر ایگل اسکواڈ کے زخمی کانسٹیبل کی مدعیت میں تھانہ سی ٹی ڈی میں درج کرلی گئی جس میں قتل، اقدام قتل، اور انسداد دہشتگردی کی دفعات شامل ہیں۔ایف آئی آر کے متن کے مطابق پولیس ناکے پر مشکوک گاڑی کو روکا گیا، اس دوران ٹیکسی ڈرائیور اور پچھلی سیٹ پر موجود شخص سے شناخت طلب کی گئی،ایف آئی آر کے مطابق پچھلی سیٹ پر بیٹھے شخص نے خود کو دھماکے سے اُڑا لیا جس کے نتیجے میں پولیس اہلکار عدیل حسین شہید ہوگیا۔دوسری جانب ترجمان اسلام آباد پولیس کے مطابق خودکش حملہ انٹیلی جنس اداروں اور اسپیشل برانچ کی بروقت اطلاعات کی وجہ سے ناکام ہوا، پوسٹمارٹم اور دیگر تحقیقات سے گاڑی میں خاتون کی موجودگی کے شواہد نہیں ملے۔ترجمان کا کہنا تھا کہ ڈرائیور یا حملہ آور نے خود کو چادر سے لپیٹا ہوا تھا جس سے خاتون کی موجودگی کا گمان ہوا، وفاقی دارالحکومت میں اگلے 48 گھنٹے کیلئے سکیورٹی ہائی الرٹ کردی گئی ہے۔
![](https://abnnews.pk/wp-content/uploads/2024/09/parlilment-371x212.jpg)