اسلام آباد (نیوز ڈیسک)پاکستان تحریک انصاف کے چیئرمین عمران خان نے کہا کہ انتخابات اور سیاسی استحکام ہی معیشت کو مستحکم کرنے کا واحد راستہ ہے، امپورٹڈ حکومت معیشت کے چیلنجز اور دہشت گردی سے نمٹنے میں ناکام رہی۔ پیر کو سماجی رابطے کی ویب سائٹ پر اپنے ایک پیغام میں سابق وزیراعظم عمران خان نے موجودہ حکومت کی کرکردگی پر برہمی کا اظہار کرتے ہوئے کہا کہ یہ امپورٹڈ حکومت چمن سے سوات سے لکی مروت سے بنوں تک کے واقعات کے ساتھ پاکستان میں دہشت گردی میں 50 فیصد اضافے سے نمٹنے میں ناکام رہی ہے جبکہ یہ بین الاقوامی پاک افغان سرحد سے ہونے والے حملوں سے نمٹنے میں بھی ناکام رہے ہیں۔انہوں نے مزید کہا کہ جہاں ہمارے سپاہی، پولیس اور مقامی لوگ روزانہ اپنی جانوں کی قربانیاں دے رہے ہیں، وہیں سب سے بری بات یہ ہے کہ دہشت گردی کے اس بڑھتے ہوئے خطرے اور ہماری مغربی سرحد کے پار سے ہونے والے حملوں کو اس حکومت کی گفتگو میں کوئی جگہ نہیں مل رہی ہے۔ سابق وزیراعظم عمران خان نے کہا کہ یہ صرف ان کے این آر او 2 اور اس کے تحفظ میں دلچسپی رکھتے ہیں، لہٰذا معیشت کی زبوں حالی کے باوجود وہ انتخابات کے انعقاد سے گھبرا رہے ہیں جو سیاسی استحکام کے ذریعے معیشت کو مستحکم کرنے کا واحد راستہ ہے۔
![](https://abnnews.pk/wp-content/uploads/2024/09/parlilment-371x212.jpg)