استنبول (اے بی این نیوز)استنبول سے اسلام آباد کی شیڈول فلائٹ کو آذربائیجان کی فضائی حدود میں شدید خرابی کا سامنا کرنا پڑا جس کے بعد پائلٹ نے ایمرجنسی ڈیکلیئر کی اور پرواز کو باکو اتار لیا۔
ایوی ایشن ذرائع کے مطابق ترکش ایئر کی پرواز TK-710 استنبول سے اسلام آباد آ رہی تھی کہ آذربائیجان کی فضائی حدود میں طیارے میں خرابی پیدا ہو گئی۔
فلائٹ ریڈار 24 کے مطابق طیارے کو گلوبل نیوی گیشن سیٹلائٹ سسٹم سے سگنلز کی فراہمی معطل ہوئی تھی۔
صورتِ حال کو دیکھتے ہوئے ایئر بس اے 330 طیارے کے پائلٹ نے ایمرجنسی کا پیغام جاری کیا۔
ذرائع کے مطابق پائلٹ نے اے ٹی سی کی رہنمائی پر طیارے کی باکو ایئر پورٹ پر بحفاظت لینڈنگ کرائی۔
مسافروں کو طیارے سے اتار کر ٹرمینل منتقل کر دیا گیا جبکہ طیارے کی خرابی دور کرنے کے لیے کام شروع کر دیا گیا۔
ترکش ایئر کی پرواز کو 3 بج کر 35 منٹ پر اسلام آباد ایئر پورٹ پر لینڈ کرنا تھا۔
مزید پڑھیں: متعدد علاقوں میں بجلی کی ہنگامی بندش، آئیسکو نے شیڈول جاری کر دیا
