اسلام آباد(نیوز ڈیسک)محکمہ موسمیات نے ملک کے مختلف علاقوں میں بارشوں کی پیشگوئی کر دی۔محکمہ موسمیات کے مطابق آج سے مغربی ہواؤں کا سلسلہ بالائی علاقوں میں داخل ہو گا ، 2 جون سے 5 جون کے دوران پنجاب کے بیشتر اضلاع میں آندھی اور بارش ہونے کی توقع ہے۔
پنجاب میں چند مقامات پر موسلاھار بارش اور ژالہ باری کا بھی امکان ہے، خیبر پختونخوا میں شدید گرمی سے گلیشیائی جھیلیں پھٹنے اور سیلابی صورتحال کا خدشہ ہے۔
صوبائی ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے صوبے کے بالائی اضلاع میں گلیشیائی جھیلوں کے پھٹنے ، فلیش فلڈز اور لینڈ سلائیڈنگ کے ممکنہ خطرات کے پیش نظر الرٹ جاری کر دیا ہے۔
پی ڈی ایم اے کی جانب سے چترال، اپر و لوئر دیر، سوات، کوہستان اور مانسہرہ کے ڈپٹی کمشنرز کو خصوصی مراسلہ ارسال کیا گیا ہے، جس میں احتیاطی اور حفاظتی اقدامات یقینی بنانے کی ہدایت کی گئی ہے۔
پی ڈی ایم اے کے مطابق صوبے میں جاری شدید گرمی کی لہر آئندہ چند روز تک برقرار رہنے کا امکان ہے، جس کے باعث شمالی اضلاع میں گلیشیئرز اور برف تیزی سے پگھل رہے ہیں۔
محکمہ موسمیات کی پیش گوئی کے مطابق 4 جون کی شام سے بالائی علاقوں میں گرج چمک کے ساتھ بارشیں متوقع ہیں، جو پہلے سے پگھلتے ہوئے گلیشیئرز کے ساتھ مل کر گلیشیائی جھیلوں کے پھٹنے اور اچانک سیلابی صورتحال پیدا کر سکتی ہیں۔
پی ڈی ایم اے نے خبردار کیا ہے کہ بارشوں کے نتیجے میں ندی نالوں اور دریاؤں میں پانی کے بہاؤ میں نمایاں اضافہ ہو سکتا ہے، جبکہ سوات، چترال، دیر، کوہستان اور مانسہرہ کے مختلف علاقوں میں فلیش فلڈز اور لینڈ سلائیڈنگ کا بھی خدشہ موجود ہے، نشیبی علاقوں اور دریا کنارے آباد آبادیوں کو خاص طور پر محتاط رہنے کی ہدایت کی گئی ہے۔
ادارے نے ضلعی انتظامیہ کو حساس مقامات کی مسلسل نگرانی، خطرناک علاقوں میں بروقت وارننگ جاری کرنے اور کمیونٹی الرٹ سسٹم کو فعال رکھنے کی ہدایت کی ہے۔
مزید برآں نشیبی علاقوں کے رہائشیوں کو پیشگی خبردار کرنے اور ممکنہ ہنگامی صورتحال سے نمٹنے کے لیے تمام متعلقہ اداروں کے درمیان رابطہ مؤثر بنانے پر زور دیا گیا ہے۔
پی ڈی ایم اے نے سیاحوں، مسافروں اور مقامی افراد کو غیر ضروری سفر سے گریز کرنے کا مشورہ دیتے ہوئے کہا ہے کہ موسمی صورتحال کے دوران احتیاطی تدابیر اختیار کی جائیں۔
ریسکیو 1122، ضلعی انتظامیہ اور دیگر متعلقہ اداروں کو بھی کسی بھی ہنگامی صورتحال سے نمٹنے کے لیے الرٹ رہنے کی ہدایت جاری کر دی گئی ہے۔
مزید پڑھیں۔ستاروں کی روشنی میں آپ کا آج (منگل) کا دن کیسا رہے گا ؟
