اسلام آباد ( اے بی این نیوز ) عمران خان سے متعلق مبینہ ڈیل کے تاثر کو مسترد کرتے ہوئے بیرسٹر عقیل نے واضح کیا ہے کہ بانی پی ٹی آئی کے لیے کوئی ڈیل میسر نہیں ہے۔ انہوں نے کہا کہ ڈیل سے متعلق رانا ثنا اللہ کے بیان کو غلط انداز میں لیا گیا اور اس کی تشریح حقیقت کے برعکس کی گئی۔
بیرسٹر عقیل کے مطابق حکومت کی جانب سے پی ٹی آئی کو صرف سنگجانی میں احتجاج کی پیشکش کی گئی تھی، جسے بعض حلقوں نے ڈیل سے تعبیر کیا، حالانکہ ایسا نہیں تھا۔ ان کا کہنا تھا کہ سیاسی معاملات کو بلاوجہ سنسنی خیز بنایا جا رہا ہے۔
انہوں نے مزید بتایا کہ بانی پی ٹی آئی کا اگلا طبی معائنہ 25 تاریخ کو ہونا ہے اور طبی معاملات مکمل طور پر ڈاکٹروں کی ہدایات کے مطابق طے کیے جا رہے ہیں۔ بیرسٹر عقیل کا کہنا تھا کہ بانی پی ٹی آئی کی جیل سے ہسپتال منتقلی کسی فرد کی خواہش پر نہیں بلکہ صرف طبی ضرورت کی بنیاد پر ہوگی۔
ایک اور اہم بیان میں بیرسٹر عقیل نے کہا کہ پی ٹی آئی کے لیے سب سے زیادہ مسائل علیمہ خان پیدا کر رہی ہیں اور ان کا مؤقف ہے کہ علیمہ خان پارٹی پر قبضہ کرنا چاہتی ہیں۔ ان کے اس بیان کے بعد سیاسی حلقوں میں نئی بحث چھڑ گئی ہے اور پارٹی کے اندرونی معاملات پر سوالات اٹھائے جا رہے ہیں۔
سیاسی مبصرین کے مطابق حالیہ بیانات سے ظاہر ہوتا ہے کہ نہ صرف قانونی بلکہ تنظیمی سطح پر بھی کشیدگی موجود ہے، جبکہ سوشل میڈیا پر بھی ان بیانات پر مختلف آرا سامنے آ رہی ہیں۔
مزید پڑھیں :عمران خان کو 25 فروری کو دوبارہ ہسپتال لے کر جایا جائے گا،انکے ڈاکٹرز کو بلائیں گے،طارق فضل چو ہدری
