ڈھاکہ ( اے بی این نیوز )بنگلہ دیش میں 13 ویں قومی اسمبلی کے انتخابات کے لیے پولنگ کا عمل مکمل ہونے کے بعد ملک بھر میں ووٹوں کی گنتی جاری ہے۔ الیکشن کمیشن کے مطابق ووٹنگ پرامن ماحول میں ہوئی اور کسی بڑے ناخوشگوار واقعے کی اطلاع سامنے نہیں آئی۔
انتخابات میں ملک بھر سے تقریباً 2 ہزار امیدوار میدان میں ہیں۔ مجموعی طور پر 51 سیاسی جماعتوں کے امیدواروں کے ساتھ آزاد امیدوار بھی مقابلے میں شریک ہیں۔ اس بار انتخابی میدان میں جماعت اسلامی اور بنگلہ دیش نیشنل پارٹی کے درمیان کانٹے کا مقابلہ دیکھنے میں آ رہا ہے۔
الیکشن کمیشن کے اعداد و شمار کے مطابق 12 کروڑ سے زائد ووٹرز ووٹ ڈالنے کے اہل تھے، جنہوں نے اپنے حق رائے دہی کا استعمال کیا۔ پولنگ اسٹیشنز پر سیکیورٹی کے سخت انتظامات کیے گئے تھے تاکہ انتخابی عمل شفاف اور پرامن رہے۔
اہم بات یہ ہے کہ سابق وزیراعظم حسینہ واجد کی جماعت عوامی لیگ کو ان انتخابات میں شرکت کی اجازت نہیں دی گئی، جس کے باعث سیاسی منظرنامے میں نمایاں تبدیلی دیکھنے میں آئی ہے۔ عوامی لیگ کی عدم موجودگی نے انتخابی مقابلے کو مزید دلچسپ اور غیر متوقع بنا دیا ہے۔
اب تمام حلقوں میں ووٹوں کی گنتی جاری ہے اور غیر حتمی نتائج موصول ہونا شروع ہو گئے ہیں۔ حتمی نتائج کے بعد یہ واضح ہو سکے گا کہ بنگلہ دیش کی نئی حکومت کون تشکیل دے گا اور پارلیمان میں کس جماعت کو برتری حاصل ہوگی۔
مزید پڑھیں :عمران خان کی بینائی شدید متاثر، مجرمانہ غفلت برتی گئی،طبی رپورٹ نہایت تشویشناک اور خطرناک ہے،سہیل آفریدی
